وزبەكستاندا سەنات دەپۋتاتتارىنىڭ سانى 100 دەن 65 كە دەيىن قىسقارادى
تاشكەنت. KAZINFORM - وزبەكستان ولي ءماجىلىسىنىڭ سەناتى پارلامەنت پالاتالارىنىڭ وكىلەتتىكتەرىن ەلدىڭ جاڭارتىلعان كونستيتۋتسياسىنا سايكەس وزگەرتۋگە باعىتتالعان زاڭنامانى ماقۇلدادى، دەپ حابارلايدى Kazinform اگەنتتىگىنىڭ وزبەكستانداعى مەنشىكتى ءتىلشىسى ءاليحان اسقار.
وزبەكستان سەناتىنىڭ باسپا ءسوز قىزمەتىنەن مالىمدەگەندەي، پارلامەنت پالاتالارىنىڭ ءبىر-ءبىرىن قايتالايتىن وكىلەتتىكتەرى ناقتىلاندى.
ەندى سەناتورلاردىڭ جالپى سانى 100 دەن 65 كە دەيىن قىسقارادى.
بۇل رەتتە ءاربىر اكىمشىلىك اۋماقتان 4 سەناتوردان سايلانادى، ال قالعان 9 دەپۋتاتتى پرەزيدەنت تاعايىندايدى.
سونداي-اق، زاڭ شىعارۋ پالاتاسى سپيكەرىنىڭ ورىنباسارلارى 7 دەن 2 گە دەيىن قىسقارادى.
بۇل رەتتە ولار ءوز مىندەتىن اتقارۋ كەزەڭىندە فراكسيا قۇرامىندا بولمايدى جانە ساياسي پارتياعا مۇشەلىگىن توقتاتا تۇرادى.
بۇعان قوسا زاڭ شىعارۋ پالاتاسى مەن سەناتقا ءوزىن-ءوزى تاراتۋ وكىلەتتىگى بەرىلەدى.
بۇل جاعدايدا زاڭ شىعارۋ پالاتاسىنداعى جاڭا سايلاۋ 2 اي ارالىعىندا، ال سەناتتىڭ جاڭا قۇرامى ءبىر اي ىشىندە جاساقتالۋى ءتيىس.
«سەناتتىڭ قۇرامى مەن كوميتەتتەردىڭ اتاۋلارىن، سونداي-اق زاڭ شىعارۋ پالاتاسى سپيكەرى ورىنباسارلارىنىڭ سانى مەن مارتەبەسىن ايقىندايتىن زاڭنىڭ ەرەجەلەرىن 2024-جىلى، كەزەكتى شاقىرىلىمداعى ولي ءماجىلىسى پالاتالارىنىڭ قىزمەتى باستالعان كەزدە ىسكە اسىرۋ جوسپارلانىپ وتىر»، - دەپ ءمالىم ەتتى سەناتتىڭ باسپا ءسوز قىزمەتى.
