وزبەكستاندا ەسكى كولىكپەن جۇرۋگە تىيىم سالىنادى

ەڭ اۋەلى اي-80 ماركالى بەنزين قولدانىستان الىنىپ تاستالادى. كەيىن قوعامدىق كولىكتەر كەزەڭ-كەزەڭىمەن ەلەكتر جانە گازعا اۋىستىرىلادى.

تاشكەنتتىڭ ەكولوگيالىق احۋالى قالا بيلىگىن الاڭداتا باستادى. مۇنىڭ باستى سەبەبى كولىكتىڭ كوپتىگى جانە اۋاعا تارالاتىن زياندى قالدىقتىڭ ارتۋىندا بولىپ وتىر. ەكولوگيا مينيسترلىگى جاعدايدى سارالاي كەلە ءبىرقاتار ۇسىنىس ەنگىزدى. اۋەلى ەسكى اۆتوكولىكتەردىڭ قولدانىسىن شەكتەۋ جايى قوزعاعان. ەندى تاشكەنتتە عانا ەمەس، بۇكىل ەل اۋماعىندا 2010 -جىلعا دەيىن شىعارىلعان تەمىر تۇلپارلاردىڭ قوزعالىسىنا تىيىم سالىنۋى مۇمكىن.

ەكىنشىدەن ەلەكتروموبيلگە كوشكەن ازاماتتارعا جەڭىلدىك جاسالۋى، ءتىپتى وعان سۋبسيديا بەرىلۋى عاجاپ ەمەس.

باحرامجون حولحۋجايەۆ، وزبەكستان ەكولوگيا، قورشاعان ورتا جانە كليماتتىق وزگەرىس مينيسترلىگىنىڭ ءبولىم باسشىسى:

- بۇگىندە ءىرى قالالاردا، ونىڭ ىشىندە تاشكەنتتە اۋا لاستانىپ جاتىر. بۇل ماسەلە ەلەكتر جانە جىلۋ ەنەرگەتيكا ورتالىقتارى مەن اۆتوكولىكتەن شىعاتىن زياندى قالدىقتىڭ شەكتەن تىس مولشەرىنەن جانە كومىر مەن مازۋت تۇتىنىنە بايلانىستى تۋىنداپ وتىر.

سونداي- اق قالادا اعاشتى زاڭسىز كەسۋ دە قورشاعان ورتامىزعا زيان تيگىزۋدە. قالادا كەپتەلىستى ازايتۋ ءۇشىن كولىك قوزعالىسىن وڭتايلاندىرۋ ۇسىنىلىپ وتىر. ماسەلەن تاجىريبە رەتىندە اۆتوكولىكتەردى «تاق جانە جۇپ» كۇندەرى جۇرگىزۋ كوزدەلگەن. ال اي-80 ماركالى بەنزينگە كەلسەك، ونىڭ ەلدەگى ءوندىرىسى 2026 -جىلعا قاراي توقتايدى. مەملەكەت ەۋرو-4 ستاندارتىنا ساي كەلمەيتىن جانارماي تۇرىنەن باس تارتپاق.

باحتير ەرگاشيەۆ، ساراپشى:

- وزبەكستاندا 5 ميلليونعا جۋىق كولىك تىركەلگەن. ونىڭ ىشىندە 700 مىڭدايى تاشكەنتتە ءجۇر. كۇنىنە وڭىرلەردەن تاعى 300 مىڭى كەلەدى. وسىنىڭ ءبارى اۋاعا زياندى قالدىق تاراتىپ جاتىر. كوبى اي-80 ماركاسىن قولدانادى. تاپ وسى اۆتوكولىكتەرگە قالدىقتاردىڭ 60 پايىزى تيەسىلى.

سوندىقتان ونى ازايتۋ ءۇشىن ۇكىمەت ەكولوگيالىق زيان دەپ تانىلعان جانارماي ءوندىرىسىن توقتاتۋ تۋرالى شەشىم قابىلدادى. قالالاردا اۋا ساپاسىنا قاتىستى كورسەتكىشتى جاريالايتىن مونيتورلار ورناتىلادى. بۇل قوندىرعىلار تۇرعىندارعا شاھارداعى قورشاعان ورتانى ۇدايى باقىلاپ وتىرۋعا مۇمكىندىك بەرەدى. ءىرى كاسىپورىندار مەن جىلۋ ورتالىقتارى كومىر مەن مازۋتتان ءماجبۇرلى تۇردە باس تارتۋى ىقتيمال. قۇزىرەتتى ورگان ولارعا تىيىم سالۋ جولىن قاراستىرىپ جاتىر.

www.24.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى