وزبەكستاندا كريپتواكتيۆتەردى زاڭسىز ساتىپ العاندارعا قاتىستى جازا ەنگىزىلدى

ءتيىستى زاڭعا ەل پرەزيدەنتى شاۆكات ميرزيەيەۆ قول قويدى، دەپ حابارلايدى Kazinform اگەنتتىگىنىڭ مەنشىكتى ءتىلشىسى ءاليحان اسقار.

قۇجاتقا ساي، كريپتوۆاليۋتانى زاڭسىز ساتىپ العان، وتكىزگەن نەمەسە ايىرباستاعان، پروۆايدەر قىزمەتىن ليتسەنزياسىز جۇزەگە اسىرعاندار 15 تاۋلىككە دەيىن قامالادى. ال قاماۋعا الۋ شاراسى قولدانىلمايتىن ازاماتتار ساناتىنا 20-30 بازالىق ەسەپتىك شاما (251-377 مىڭ تەڭگە) ارالىعىندا ايىپۇل سالىنادى.

پروۆايدەرلەردىڭ كومەگىمەن انونيمدى كريپتواكتيۆ وپەراتسيالارىن جۇرگىزگەن لاۋازىمدى تۇلعالار 30 دان 40 بازالىق ەسەپتىك شاماعا دەيىن (377-503 مىڭ تەڭگە ارالىعى) ايىپپۇل ارقالايدى.

زاڭمەن بەلگىلەنگەن ءتارتىپتى بۇزا وتىرىپ، ماينينگ قىزمەتىن جۇزەگە اسىرعاندارعا مىناداي جازا قولدانىلادى: 5 تاۋلىككە دەيىن اكىمشىلىك قاماققا الۋ نەمەسە جابدىقتارىن تاركىلەۋ. ال قاماۋعا الۋعا بولمايتىن تۇلعالار 20-30 بازالىق ەسەپتىك شاما (251-377 مىڭ تەڭگە) ارالىعىندا ايىپپۇل تولەۋى ءتيىس.

بۇعان قوسا، انونيمدى كريپتواكتيۆتەردى وندىرۋمەن اينالىسقانداردىڭ كريپتواكتيۆتەرى مەن جابدىقتارى تاركىلەنەدى، ال لاۋازىمدى تۇلعالارعا 30 دان 40 بازالىق ەسەپتىك شاماعا دەيىن (377-503 مىڭ تەڭگە ارالىعى) ايىپپۇل سالىنادى.

سونداي-اق زاڭدا جازىلعانداي، ۇيالى تەلەفوننىڭ حالىقارالىق بىرەگەي سايكەستەندىرۋ كودىن ءوندىرۋشىنىڭ رۇقساتىنسىز وزگەرتۋگە جانە ول ءۇشىن ارنايى باعدارلاما ازىرلەۋگە، تاراتۋعا، ونى پايدالانۋعا تىيىم سالىنادى. مۇنداي قۇقىق بۇزۋشىلىق ءۇشىن 15 تەن 20 بازالىق ەسەپتىك شامعا دەيىن (188-251 مىڭ تەڭگە ارالىعى) ايىپپۇل سالىنادى.

ال ءوندىرۋشىنىڭ نەمەسە يەسىنىڭ رۇقساتىنسىز SIM كارتانىڭ كوشىرمەسىن جاساعان جانە وعان وزگەرىس ەنگىزگەندەر 20 بازالىق ەسەپتىك شاما (251 مىڭ تەڭگە) كولەمىندەگى ايىپپۇلمەن جازالانادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى