وزبەكستان توپىراعىن جوعارى دەڭگەيدە تۇز باسقان الەمدەگى 10 ەلدىڭ قاراتىنا ەندى
تاشكەنت. KAZINFORM - «وزبەك عارىش» اگەنتتىگى توپىراعى تۇزدانعان جەرلەردى عارىشتان انىقتاۋ تاجىريبەسىن جولعا قويادى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
- باستاپقى كەزەڭدە دجيزاك وبلىسىنداعى 90 ەگىس القابىنا مونيتورينگ جۇرگىزىلەدى. وندا سپۋتنيكتەن الىنعان سۋرەتتەرگە تالداۋ جاسالىپ، توپىراقتىڭ تۇزدىلىق دەڭگەيى انىقتالادى. كەيىن دەرەكتەر ارنايى ورتالىقتاردا زەرتتەلەدى، - دەلىنگەن «وزبەك عارىش» اگەنتتىگىنىڭ باسپا ءسوز قىزمەتى تاراتقان حابارلامادا.
ۆەدومستۆودان اتاپ وتكەندەي، مونيتورينگ ناتيجەسىندە الىنعان دەرەكتەر نەگىزىندە رەسپۋبليكاداعى تۇزدانۋ دەڭگەيى جوعارى جەرلەردىڭ ستاتيستيكاسى ازىرلەنەدى. كەيىن اقپارات ديقاندارعا ۇسىنىلادى.
- ناتيجەسىندە اۋىل شارۋاشىعى ماقساتىنداعى جەردى پايدالانۋ كەزىندە رەسۋرستاردى ەسەپپەن ءبولىپ، جەردىڭ تۇزدانۋ دارەجەسىنە قاراي ءتيىستى شارالار قابىلداۋعا بولادى، - دەپ ءمالىم ەتتى اگەنتتىكتەن.
ب ۇ ۇ- نىڭ بىلتىرعى زەرتتەۋىنە سايكەس، وزبەكستان توپىراق تۇزدىلىعى جوعارى الەمدەگى 10 ەلدىڭ قاراتىنا ەندى. «وزبەك عارىشتىڭ» مالىمەتىنشە، رەسپۋبليكا اۋماعىندا 1746,6 مىڭ گەكتار القاپتى سورتاڭ تارتقان. ونىڭ ىشىندە 65,2 مىڭ گەكتاردا تۇزدىلىق دەڭگەيى وتە جوعارى سانالادى.
- ارالدىڭ تارتىلۋى ناتيجەسىندە 5,5 ميلليون گەكتاردان استام جەر تۇزدىلىق دەڭگەيى وتە جوعارى شولگە اينالدى، - دەلىنگەن حابارلامادا.
ەسكە سالايىق، كەلەر جىلى وزبەكستان تۇركى مەملەكەتتەرى ۇيىمىنا مۇشە ەلدەرمەن بىرلەسىپ عارىشعا سپۋتنيك ۇشىرادى.
تاياۋدا كورشىلەس ەل عارىش كەڭىستىگىن زەرتتەۋگە باعىتتالعان حالىقارالىق شارتقا قوسىلعان ەدى.
بۇعان دەيىن حابارلاعانىمىزداي، قازاقستان مەن وزبەكستان عارىش سالاسىنداعى سەرىكتەستىكتى نىعايتۋعا نيەتتى.
اۆتور
ءاليحان اسقار
