وزبەكستان، تۇرىكمەنستان: تۇركى مادەنيەتى مەن مۇراسى قورىنا مۇشە ەلدەر سانى ارتادى
استانا. KAZINFORM - استانادا وتكەن تۇركى مادەنيەتى مەن مۇراسى قورى كەڭەسىنىڭ II وتىرىسىندا اقتوتى رايىمقۇلوۆا جاقىندا ۇيىمعا مۇشە ەلدەر قاتارى تولىعاتىنىن حابارلادى.
- قىرعىز رەسپۋبليكاسىنىڭ بىشكەك قالاسىندا 2024-جىلعى 6-قاراشادا وتكەن تۇركى مەملەكەتتەرى ۇيىمى مەملەكەت باسشىلارى كەڭەسىنىڭ 11-سامميتىندە وزبەكستان رەسپۋبليكاسىنىڭ پرەزيدەنتى شاۆكات ميرزيەيەۆ مىرزا ءوز سوزىندە وزبەكستان تاراپىنىڭ ءبىزدىڭ قوردىڭ تولىققاندى مۇشەسى بولۋعا دايىن ەكەندىگىن ءبىلدىردى. قورعا مۇشە مەملەكەتتەردىڭ سانىن ارتتىرۋ - ءبىزدىڭ قىزمەتىمىزدەگى باستى ستراتەگيالىق باعىتتاردىڭ ءبىرى ەكەندىگىن اتاپ وتكەن ءجون، - دەدى قور باسشىسى.
سونىمەن قاتار اقتوتى رايىمقۇلوۆا تۇرىكمەنستان مەملەكەتى ديپلوماتيالىق نوتا ارقىلى قورعا باقىلاۋشى مەملەكەت رەتىندە قوسىلۋعا دايىن ەكەندىگىن جەتكىزگەنىن اتاپ ءوتتى.
- بۇل ۇسىنىستار جان-جاقتى پىسىقتالۋدا، جاقىن ارادا اتالعان مەملەكەتتەردى قورعا مۇشە جانە باقىلاۋشى مەملەكەتتەر قاتارىندا كورەمىز دەپ ويلايمىز، - دەدى ول.
ايتا كەتەيىك، اتالعان وتىرىستى اشقان ق ر مادەنيە جانە اقپارات ءمينيسترى ايدا بالايەۆا تۇركىستاندا رەستاۆراتورلار دايارلاۋدى ۇسىندى.
بۇعان دەيىن استاناداعى ۇلتتىق مۋزەيدە «ديۋاني لۇعات ات-تۇرك» سوزدىگىنىڭ 950 جىلدىعىنا وراي حالىقارالىق كورمە اشىلعانىن جازعان ەدىك.
