وزبەكستان، تاجىكستان جانە قىرعىز رەسپۋبليكاسى ازيا كۋبوگىن وتكىزۋگە بىرلەسكەن ءوتىنىم بەردى
تاشكەنت. KAZINFORM - ازيا فۋتبول كونفەدەراتسياسى ازيا قۇرلىعىنداعى ەڭ بەدەلدى فۋتبول تۋرنيرى - 2031-جىلعى ازيا كۋبوگىن وتكىزۋگە ۇمىتكەرلەردى قاراستىرا باستادى، دەپ حابارلايدى Kazinform وزبەكستان فۋتبول اسسوتسياتسياسىنا سىلتەمە جاساپ.
سوڭعى جىلدارى ورتالىق ازيادا فۋتبولدى دامىتۋ باعىتىندا جۇرگىزىلگەن رەفورمالارعا، جاسالىپ جاتقان جاعدايلارعا، ولاردىڭ حالىقارالىق ارەناداعى ىقپالىنا سۇيەنە وتىرىپ، وزبەكستان، تاجىكستان جانە قىرعىز رەسپۋبليكاسىنىڭ فۋتبول قاۋىمداستىقتارى ازيا كۋبوگىنىڭ جوعارى دەڭگەيدە وتەتىنىنە سەنىم ءبىلدىرىپ، بىرلەسكەن كانديداتۋراسىن ورتاعا سالدى.
بۇگىندە وزبەكستان كورشى ەلدەرمەن بىرگە بەدەلدى جارىستى وتكىزۋگە تولىقتاي دايىن. تاشكەنت، نامانگان، فەرعانا، قارشي سياقتى قالالارداعى ستاديوندار حالىقارالىق ستاندارتتارعا سايكەستەندىرىلدى.
ءو ف ا باسپا ءسوز قىزمەتىنىڭ مالىمدەۋىنشە، ورتالىق ازيا، ادەتتەگىدەي، ءوزىنىڭ قوناقجايلىلىعىمەن، كاسىبي كوزقاراسىمەن، فۋتبولعا دەگەن ادالدىعىمەن جانە ارينە، فۋتبول جانكۇيەرلەرىنىڭ سۇيىسپەنشىلىگىمەن بۇكىل ازيانىڭ نازارىن اۋدارۋعا دايىن.
ەستەرىڭىزگە سالا كەتەيىك: وزبەكستاندا سوڭعى جىلدارى 20 جانە 23 جاسقا دەيىنگى ازيا كۋبوگى مەن فۋتزالدان الەم چەمپيوناتى جوعارى دەڭگەيدە ۇيىمداستىرىلدى جانە بۇل جارىستار الداعى بەدەلدى تۋرنيرلەر الدىنداعى ۇلكەن سىناق بولىپ تابىلادى.
فۋتزالدان وزبەكستاندا وتكەن الەم چەمپيوناتىندا قازاقستان قۇراماسى شيرەك فينالعا شىققان ەدى.
