وزبەكستان مەن تاجىكستان اراسىنداعى وداقتاستىق قارىم-قاتىناس تۋرالى شارت كۇشىنە ەندى
تاشكەنت. KAZINFORM - بۇگىن حۋدجاند قالاسىندا وزبەكستان مەن تاجىكستاننىڭ سىرتقى ىستەر مينيسترلەرى ەكى ەل اراسىنداعى وداقتاستىق قارىم-قاتىناستى راتيفيكاتسيالايتىن قۇجاتقا قول قويدى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
قول قويۋ ءراسىمى وزبەكستان، تاجىكستان جانە قىرعىزستان پرەزيدەنتتەرىنىڭ العاشقى سامميتى اياسىندا ءوتتى. وسىلايشا، وسىدان ءبىر جىل بۇرىن مەملەكەت باسىشىلارى دەڭگەيىندە ماقۇلدانعان قۇجات رەسمي كۇشىنە ەندى.
سونىمەن قاتار، ساپار بارىسىندا شاۆكات ميرزيەۆ پەن ەمومالي راحمون شاعىن قۇرامدا كەلىسسوز جۇرگىزدى. وندا تاراپتار ەكى ەل اراسىنداعى بايلانىستاردى تەرەڭدەتۋ مۇمكىندىكتەرىن تالقىلادى. كەزدەسۋدە ءمالىم بولعانداي، بىلتىر رەسمي تاشكەنت پەن دۋشانبە 700 ميلليون دوللارعا ساۋدا-ساتتىق جاساعان.
بۇعان قوسا، پرەزيدەنتتەر تاياۋدا وزبەكستاندا وتەتىن «ورتالىق ازيا - ەۋرووداق» سامميتىنە، ورتالىق ازيا ەلدەرى مەملەكەت باسشىلارىنىڭ جەتىنشى كونسۋلتاتيۆتىك كەزدەسۋىنە دايىندىق بارىسىن پىسىقتادى.
مۇنىمەن بىرگە، وزبەكستان، تاجىكستان جانە قىرعىزستان باسشىلارى مەملەكەتتىك شەكارالاردىڭ توعىسۋ نۇكتەسى جونىندەگى شارتقا قول قويىپ، «دوستىق جەبەسى» مونۋمەنتىنىڭ اشىلۋ سالتاناتىنا قاتىستى.
ەسكە سالايىق، Kazinform اگەنتتىگىنە سۇحبات بەرگەن بەلگىلى وزبەكستاندىق ساياساتتانۋشى فارحود توليپوۆ العاشقى ءۇشجاقتى سامميتتتىڭ ءمان-ماڭىزى مەن ونىڭ بارىسىندا تالقىلانۋى ىقتيمال ماسەلەلەردى قاتىستى پىكىر بىلدىرگەن ەدى.
