وزبەكستان مەن قىتاي اراسىنداعى تاۋار اينالىمى 50 پايىزعا ءوستى
تاشكەنت. KAZINFORM - وزبەكستان پرەزيدەنتى شاۆكات ميرزيەيەۆتىڭ قىتايعا جاساعان مەملەكەتتىك ساپارى ق ح ر مەملەكەتتىك كەڭەسىنىڭ پرەمەرى لي تسيانمەن كەزدەسۋدەن باستادى، دەپ حابارلايدى Kazinform اگەنتتىگىنىڭ مەنشىكتى ءتىلشىسى ءاليحان اسقار.
وزبەكستان باسشىسىنىڭ باسپا ءسوز قىزمەتىنەن مالىمدەگەندەي، كەزدەسۋ بارىسىندا ساۋدا-ەكونوميكالىق سالاداعى ءوزارا ءىس-قيمىلدى ودان ءارى نىعايتۋ ماسەلەلەرى قارالدى. بۇل رەتتە وزبەك-قىتاي قاتىناستارى بارلىق سالا مەن باعىتتاردا بۇرىن-سوڭدى بولماعان دەڭگەيگە جەتكەنى اتاپ ءوتىلدى.
«وتكەن جىلى تاۋار اينالىمى 50 پايىزعا ءوسىپ، 14 ميلليارد دوللارعا جەتتى. بۇل كورسەتكىشتى 20 ميلليارد دوللارعا دەيىن ارتتىرۋ مۇمكىندىگى قاراستىرىلىپ وتىر. وزبەكستان ەكونوميكاسىنا باعىتتالعان قىتايلىق ينۆەستيتسيالاردىڭ جالپى كولەمى 14 ميلليارد دوللاردان استى»، - دەپ مالىمدەدى پرەزيدەنتتىڭ باسپا ءسوز قىزمەتىنەن.
شاۆكات ميرزيەيەۆ پەن لي تسيان ينفراقۇرىلىمدى جاڭعىرتۋ، ونەركاسىپتىك كووپەراتسيانى كەڭەيتۋ، اۋىل شارۋاشىلىعىنداعى تەحنولوگيالار ترانسفەرى جانە «جاسىل» ەنەرگەتيكانى دامىتۋ بويىنشا ىنتىماقتاستىقتىڭ جەكەلەگەن باعدارلامالارىن دايىنداۋدى تالقىلادى.
سونىمەن قاتار قىتايدىڭ قارجى ينستيتۋتتارىمەن ءوزارا ءىس-قيمىل پەرسپەكتيۆالارى جانە قىتايلىق كومپانيالاردىڭ وزبەكستانداعى جەكەشەلەندىرۋ پروتسەستەرىنە قاتىسۋى قارالدى.
ەسكە سالايىق، 23-25- قاڭتار ارالعىندا وزبەكستان پرەزيدەنتى شاۆكات ميرزيەيەۆ قىتايعا مەملەكەتتىك ساپارمەن باراتىنىن جازىپ ەدىك.
