وزبەكستان مەن قىتاي اراسىندا 30 كۇندىك ۆيزاسىز رەجيم ەنگىزىلەدى
تاشكەنت. KAZINFORM - وزبەكستان مەن قىتايدىڭ سىرتقى ىستەر مينيسترلەرى ازاماتتارعا 30 كۇن ىشىندە ۆيزاسىز قوس ەلگە بارۋعا مۇمكىندىك بەرەتىن كەلىسىمگە قول قويدى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
«وزبەكستان مەن قىتاي باسشىلارى اراسىندا قول جەتكىزىلگەن ۋاعدالاستىقتاردى ىسكە اسىرۋ شەڭبەرىندە ارىپتەسىممەن بىرگە ازاماتتارعا 30 كۇن بويى ۆيزاسىز ساياحاتتاۋعا مۇمكىندىك بەرەتىن كەلىسىمگە قول قويدىق. بۇل -حالىقتار اراسىنداعى بايلانىستى نىعايتىپ، ساۋدا- ساتتىق كولەمىن ۇلعايتۋعا باعىتتالعان ۇلكەن ىستەردىڭ ءبىر پاراسى»، - دەپ جازدى وزبەكستاننىڭ سىرتقى ىستەر ءمينيسترى باحتيەر سايدوۆ ءوزىنىڭ الەۋمەتتىك جەلىدەگى رەسمي پاراقشاسىندا.
اتالعان كەلىسىمنىڭ ناقتى قاشان كۇشىنە ەنەتىنى قوسىمشا حابارلانادى.
ەسكە سالايىق، بۇعان دەيىن وزبەكستان مەن قىتاي ۆيزاسىز رەجيم ورناتۋعا مۇددەلى ەكەنىن جازىپ ەدىك.
قازاقستان مەن قىتاي اراسىندا ۆيزاسىز رەجيم بىلتىر 10- قاراشادا ورنادى. وعان ساي، قازاقستان ازاماتتارى قىتاي اۋماعىندا، قىتاي ازاماتتارى قازاقستاندا 30 كۇننەن اسپايتىن ۋاقىت ارالىعىندا ۆيزاسىز جۇرە الادى.
