وزبەكستان لوس-اندجەلەس وليمپياداسىندا ۇزدىك وندىققا ەنۋگە نيەتتى

سپورت سالاسىنداعى ماسەلەلەر قارالعان كەڭەستە وزبەكستان پرەزيدەنتى شاۆكات ميرزيەيەۆ شەنەۋنىكتەرگە وسىنداي تاپسىرما بەردى. ول ءۇشىن جاۋاپتى ۇكىمەت مۇشەلەرىنەن باستاپ، اۋدان، اۋىل حوكيمدەرىنە دەيىن جۇمىستى جۇيەلى جولعا قويۋعا مىندەتتەلدى.

جينالىستا شاۆكات ميرزيەيەۆ سپورت فەدەراتسيالارىنىڭ ءتوراعالارى مەن رەسپۋبليكالىق ۇيىم جەتەكشىلەرىنىڭ جۇمىسىن سىنعا الدى. اتاپ ايتقاندا، شەنەۋنىكتەر مەن باپكەرلەردىڭ اراسىندا بايلانىس جوق. ونىڭ سالدارى سپورتتاعى تومەن ناتيجەلەرگە اكەلىپ جاتىر.

- وزبەكستاننىڭ وليمپيادا تاريحى تەك جەكپە-جەك سپورتى تۇرلەرىندەگى جەتىستىكتەرمەن جازىلىپ جاتىر. پاريجدەگى باسەكەدە بوكس، دزيۋدو، تاەكۆوندو، اۋىر اتلەتيكا مەن ەركىن كۇرەستەن مەدال ەنشىلەدىك. دەمەك قالعان سپورت تۇرلەرىن دامىتۋ كەرەك. ەلدىڭ يمميدجى مەن حالىقتىڭ رۋحىن كوتەرۋدە سپورتتىڭ ورنى ايرىقشا، - دەدى وزبەكستان باسشىسى.

بىلتىر پاريج وليمپياداسىندا وزبەكستان قۇراماسى جالپى ەسەپتە 13-ورىننان كورىندى. بۇل رەتتە ش. ميرزيەيەۆ فرانسياداعى كورسەتكىشپەن توقمەيىلىسۋگە بولمايتىنىن قاداپ ايتتى.

اتالعان ولقىلىقتاردى جويۋ ءۇشىن ءار وڭىردە ۇلتتىق وليمپيادا كوميتەتىنىڭ بولىمشەلەرى اشىلادى. سونىمەن قوسا، ايماقتارداعى سپورتشىلاردى ىرىكتەۋدىڭ سيفرلىق پلاتفورماسى قۇرىلادى. 4 جىلدىقتىڭ باستى باسەكەسىنە دايىندىقتى كۇشەيتۋ ماقساتىندا قاجەتتى ينفراقۇرىلىم جاساقتاۋعا 300 ميلليارد سۋم (شامامەن $23 ميلليون) بولىنەدى.

بىلتىر وليمپياداشىلاردى ماراپاتتاعان ش. ميرزيەيەۆ وزبەكستان تاريحي جەتىستىككە قول جەتكىزگەنىن مالىمدەگەن بولاتىن.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى