وزبەكستان استاناسىندا قايىر تىلەۋشىلەرگە قارسى رەيد باستالدى
تاشكەنت. KAZINFORM - تاشكەنت قالاسىنىڭ كوشەلەردە قايىر سۇراۋمەن اينالىساتىنداردى انىقتاۋعا باعىتتالعان رەيد ءجۇرىپ جاتىر، دەپ حابارلايدى Kazinform اگەنتتىگىنىڭ تاشكەنتتەگى مەنشىكتى ءتىلشىسى ءاليحان اسقار.
تاشكەنت قالالىق باس ىشكى ىستەر باسقارماسىنىڭ مالىمەتىنشە، مەشىت، جولداردىڭ بويى مەن قيىلىستاردا قايىر سۇراۋدى كاسىپ ەتكەن 26 ايەلگە قاتىستى اكىمشىلىك حاتتاما تولتىرىلعان. سونىمەن قوسا، ولاردىڭ جانىندا بۇل ىسكە تارتىلعان 13 كامەلەتكە تولماعان بالانىڭ بولعانى انىقتالىپ، بۇلدىرشىندەر الەۋمەتتىك قورعاۋ ورتالىعىنا ورنالاستىرىلدى.
بۇعان قوسا، جەدەل الدىن الۋ ءىس-شاراسى بارىسىندا قايىر تىلەۋشىلەرمەن بىرگە ءۇش بوتەن بالانىڭ جۇرگەنى بەلگىلى بولدى. ولار اتا-انالارىنا قايتارىلدى.
ايتا كەتەيىك، وزبەكستان زاڭناماسىنا ساي، قايىر سۇراعان ازاماتتارعا اكىمشىلىك جاۋاپكەرشىلىك قاراستىرىلعان. ەگەر مۇنداي ارەكەت قايتالانىپ جاسالاتىن بولسا، وندا قىلمىستىق جازا قولدانىلۋى مۇمكىن.
اۆتور
ءاليحان اسقار
