وزبەكستان 2035 -جىلعا دەيىن ە ى ۇ- نى دامىتۋ تۇجىرىمداماسىن ازىرلەۋدى ۇسىندى
تاشكەنتتە ءوتىپ جاتقان ەكونوميكالىق ىنتىماقتاستىق ۇيىمىنىڭ (ە ى ۇ) 16- سامميتىندە وزبەكستان رەسپۋبليكاسىنىڭ پرەزيدەنتى شاۆكات ميرزيەۆ ۇيىم الدىنا قويىلعان مىندەتتەردىڭ ورىندالۋىنا توقتالىپ، ءبىرقاتار باستاما كوتەردى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
وزبەكستان باسشىسى 2035 -جىلعا دەيىنگى ە ى ۇ اياسىنداعى ىنتىماقتاستىقتىڭ نەگىزىگى سالالارىن ايقىندايتىن تۇجىرىمداما قابىلداۋدى ۇسىندى.
«وزبەكستان ۇيىمنىڭ نەگىزگى قۇجاتى - «پەرسپەكتيۆالار - 2025» جوباسىنىڭ قورىتىندىسىن شىعارۋدى قولدايدى. سونىمەن قاتار ە ى ۇ- نىڭ باسىم باعىتتارىن ايقىندايتىن «ەكونوميكالىق ىنتىماقتاستىقتىڭ ستراتەگيالىق ماقساتتارى - 2035» تۇجىرىمدامالىق قۇجاتىن ازىرلەۋگە كىرىسەتىن كەز كەلدى دەپ سانايمىز»، - دەدى شاۆكات ميرزيەۆ.
ءمالىم بولعانداي، بىلتىر ە ى ۇ ەلدەرى اراسىنداعى ءوزارا ساۋدا- ساتتىق 85 ميلليارد دوللارعا جەتكەن. بۇل - ۇيىمعا مۇشە مەملەكەتتەردىڭ جالپى سىرتقى ساۋداسىنىڭ 8 پايىزى عانا. سوندىقتان شاۆكات ميرزيەۆ ەلدەر اراسىنداعى ەكسپورت پەن يمپورتقا قويىلاتىن تالاپتاردى جەڭىلدەتۋدى ۇسىندى.
«ءالى كۇنگە دەيىن كەدەرگىسىز ساۋدا پلاتفورماسىن قۇرۋدا كوپتەگەن شەكتەۋلەر مەن پروبلەمالار بار. ءبىز جاعدايعا تىڭ كوزقاراسپەن قاراپ، ونى ۇتىمدى جاققا وزگەرتۋىمىز كەرەك»، - دەپ ۇسىنىس ءبىلدىردى وزبەكستان پرەزيدەنتى.
سامميت بارىسىندا ەكونوميكالىق ماسەلەلەردەن بولەك، مادەني- گۋمانيتارلىق ىنتىماقتاستىق تا ءسوز بولدى. ماسەلەن، ە ى ۇ- عا مۇشە ەلدەردىڭ اۋماعىندا يۋنەسكو- نىڭ بۇكىلالەمدىك مۇرالارى تىزىمىنە ەنگەن 90-عا جۋىق ەسكەرتكىش بار. سونداي- اق، اتالعان ۇيىم مەملەكەتتەرىنە جىل سايىن 80 ميلليونعا جۋىق شەتەلدىك تۋريست كەلەدى.
«ترانسشەكارالىق باعىتتاردىڭ مول مۇمكىندىگىن ەسكەرە وتىرىپ، بىرلەسكەن تۋريستىك مارشرۋتتاردى اشۋدى جانە «جىبەك جولى» برەندىمەن جالپى تۋريستىك باعدارلامالار سانىن ۇلعايتۋدى ۇسىنامىن»، - دەپ توقتالدى شاۆكات ميرزيەۆ.
وزبەكستان باسشىسى ە ى ۇ حاتشىلىعى جانىنان قۇرامىنا تۋريستىك اكىمشىلىكتەر مەن مۇشە ەلدەردىڭ جەتەكشى ساراپشىلارى ەنەتىن تۋريزم جونىندەگى جەكە كونسۋلتاتيۆتىك كوميتەت قۇرۋدى ۇسىندى.
شاۆكات ميرزيەۆتىڭ ايتۋىنشا، اتالعان كوميتەتتىڭ العاشقى كەزدەسۋى كەلەر جىلى ەكونوميكالىق ىنتىماقتاستىق ۇيىمىنىڭ تۋريستىك استاناسى بولىپ جاريالاعان شاحريسابز قالاسىندا ءوتۋى مۇمكىن.
ەسكە سالايىق، بۇگىن تاشكەنتتە ەكونوميكالىق ىنتىماقتاستىق ۇيىمىنىڭ 16- ءسامميتى ءوتىپ جاتىر. وعان ازەربايجان پرەزيدەنتى يلحام اليەۆ، يران باسشىسى يبراحيم رايسي، قىرعىز رەسپۋبليكاسىنىڭ پرەزيدەنتى سادىر جاپاروۆ، تاجىكستان مەملەكەتىنىڭ باسشىسى ەمومالي راحمون، تۇرىكمەنستان پرەزيدەنتى سەردار بەردىمۇحامەدوۆ، تۇركيا ەلىنىڭ باسشىسى رەجەپ تايپ ەردوعان، قازاقستاننىڭ پرەمەر- ءمينيسترى ءاليحان سمايىلوۆ، پاكىستان ۋاقىتشا ۇكىمەتىنىڭ باسشىسى انۆار ۋل- حاك كاكار جانە ە ى ۇ- نىڭ باس حاتشىسى حۋسراۆ نوزيري قاتىسىپ وتىر.
اۆتور
ءاليحان اسقار
