وزبەكستان 2030-جىلعا قاراي ارال قايراڭىنىڭ 78 پايىزىن جاسىل جەلەككە اينالدىرماق
ءبىز جىل سايىن ارال قايراڭىنىڭ 100 مىڭ گەكتار اۋماعىنا تۇز بەن شولگە شىدامدى وسىمدىكتەر وتىرعىزۋعا تىرىسامىز.
سامارقاند قالاسىندا (وزبەكستان) ءوتىپ جاتقان ب ۇ ۇ- نىڭ شولەيتتەنۋمەن كۇرەس جونىندەگى كونۆەنتسياسىنىڭ (CRIC 21) وتىرىسىندا وزبەكستان ورمان شارۋاشىلىعى اگەنتتىگىنىڭ باس مامانى حادجيمۋرات توليپوۆ وسىلاي ءمالىم ەتتى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
«6 ميلليون گەكتاردى الىپ جاتقان تەڭىز ءبۇتىن ءبىر ۇرپاقتىڭ كوز الدىندا جويىلدى. بۇگىندە ونىڭ 90 پايىزى جوق. سۋ رەسۋرسىنىڭ ازدىعىنا بايلانىستى بۇل تەرريتوريالارعا سۋ باعىتتاي المايمىز. تيىسىنشە، ول قۇم مەن تۇز باسقان شولەيتكە اينالدى. سوندىقتان ءبىزدىڭ الدىمىزعا وسى جەرلەرگە وسىمدىك ەگۋ مىندەتى قويىلدى. ول جەل سالدارىنان اتموسفەراعا كوتەرىلەتىن تۇز بەن قۇمدى داۋىلداردى ازايتۋعا ىقپال ەتەدى. باستاپقىدا ءبىز جىلىنا 16-18 مىڭ گەكتار اۋماققا جاسىل جەلەك وتىرعىزدىق. بۇل وتە از، مۇنداي قارقىنمەن ارال قايراڭىن ورمانعا اينالدىرۋعا 100 جىل كەتەر ەدى»، - دەپ توقتالدى حادجيمۋرات توليپوۆ.
ونىڭ سوزىنشە، 2018-جىلدان باستاپ بۇل كولەم ۇلعايتىلعان. اتاپ ايتقاندا، كەيىنگى 4 جىلدا ارالدىڭ وزبەكستان تەرريتورياسىنداعى 1 ميلليون 700 مىڭ گەكتار اۋماعىنا تۇزدى جەرگە شىدامدى وسىمدىكتەر وتىرعىزىلدى.
«قازىر سەكسەۋىل وتىرعىزۋ قيىندىق تۋعىزاتىن ايماقتار قالىپ وتىر. جالپى ءبىز جىل سايىن 100 مىڭ گەكتار اۋماقتى قامتۋعا تىرىسامىز. بۇل رەتتە ءبىز قازاقستاندىق ارىپتەستەرىمىزبەن بىرلەسە جۇمىس اتقارامىز. ءبىر-ءبىرىمىزدىڭ تەحنولوگيا، ءادىس-تاسىلدەرىمىزبەن تانىسامىز. ءبىز بىرلەسىپ قانا ارال اپاتىنىڭ سالدارىن جويا الامىز. 2028-جىلعا قاراي وزبەكستان تاراپى جالپى اۋماقتىڭ %60 ىن، ال 2030-جىلعا جاقىن 78 پايىزىن جاسىل جەلەككە اينالدىرۋ جوسپارىن قويىپ وتىر»، - دەدى ح. توليپوۆ.
ايتا كەتەيىك، پرەزيدەنت قاسىم-جومارت توقايەۆ 2021-2025-جىلدار ارالىعىندا ارالدىڭ تابانىندا 1,1 ميلليون گەكتار اۋماقتا اعاش وتىرعىزۋ مىندەتىن قويدى. تاپسىرماعا سايكەس، قىزىلوردا وبلىسىندا ورمان شارۋاشىلىعى جانە جانۋارلار دۇنيەسى كوميتەتى، سونىمەن قاتار ورمان مەكەمەلەرىنىڭ كۇشىمەن 2021-جىلى 100 مىڭ گەكتار جەرگە سەكسەۋىل كوشەتى وتىرعىزىلدى.
ال، 2022-2025-جىلدار ارالىعىندا جىل سايىن 250 مىڭ گەكتار الاڭدا اعاش وتىرعىزىلماق. عالىمداردىڭ ەسەپتەۋىنشە، 1 گەكتار اۋماقتاعى 4 جىلدىق سەكسەۋل جىل سايىن 1158,2 كەلى كومىرقىشقىل گازىن ءسىڭىرىپ، 835,4 كەلى وتتەگىن بولەدى جانە 800 توننادان استام قۇم مەن تۇزدى ۇستاپ قالادى.
