وزبەك جازۋشىسى شوقان ءۋاليحانوۆ جايلى پوۆەست جازدى
استانا. قازاقپارات - وزبەكستاندىق جازۋشى ۆلاديمير فەتيسوۆ قازاقتىڭ تۇڭعىش عالىمى شوقان ءۋاليحانوۆ جايلى پوۆەست جازدى، دەپ حابارلايدى 24kz.
ازىرگە شىعارمانىڭ ۇزىندىلەرى جەرگىلىكتى باسپا بەتىندە اپتا سايىن جاريالانىپ كەلەدى. اۆتور كوپ ۇزاماي كىتاپ بولىپ باسىلىپ شىعاتىنى ايتادى.
ۆلاديمير فەتيسوۆ اسكەري بارلاۋ تاقىرىبىنا قالام تەربەيدى. ول، اسىرەسە، XIX عاسىردا تۇركىستان ايماعى ءۇشىن تالاسقان رەسەي مەن بريتانيانىڭ ساياسي ويىنىنا تەرەڭ ۇڭىلەدى. «شوقان ءۋاليحانوۆ تۇلعاسى الىپ يمپەريالار تەكەتىرەسىندە ۇلكەن ءرول اتقاردى»، - دەيدى اۆتور.
شوقان ءۋاليحانوۆتىڭ تاريحي تۇلعاسى ۆلاديمير فەتيسوۆتى بىردەن باۋراپ العان. جاستايىنان اكەري تارتىپكە ماشىقتانعان قازاق وفيتسەرى عىلىمعا دا مول ۇلەس قوستى. الىپ يمپەريالاردىڭ تارتىسى كەزىندە وزىنە ارتىلعان ميسسيانى اسا ىجداحاتتىقپەن ورىندادى.
ۆلاديمير فەتيسوۆ، وزبەكستان جازۋشىلار وداعىنىڭ مۇشەسى:
- شوقان ءۋاليحانوۆ - قاشقارياعا تىڭشى بولىپ تۇڭعىش ساپار جاساعان وفيتسەر. ماركو پولونىڭ جازعاندارى بار. ءبىراق ونىڭ دەرەكتەرى عىلىمي ورتادا كۇمان تۋعىزدى. ال شوقان ءۋاليحانوۆ قاشقاريانى جاڭا قىرىنان كورسەتتى. ماسەلەن ول نەمىس-بريتان ساياحاتشىسى ادولف شلاگونۆەيدتىڭ قۇپيا ءولىمىنىڭ سىرىن اشتى. قاشقاردان العاشقى كارتا مەن ەتنوگرافيالىق سۋرەتتەر اكەلدى. ول ءوزى دە مىقتى سۋرەتشى ەدى. بۇل سول كەزدەگى عىلىمي ورتادا ۇلكەن جاڭالىق بولدى.
شوقاننىڭ قايتالانباس تۇلعا ەكەنى سول زامانداردا ايتىلدى. شوقان جايلى ايتىلماي قالعان سىر از. الايدا پوۆەست اۆتورى تاشكەنت ارحيۆتەرىنەن قۇندى قۇجاتتاردى كورگەنىن ايتادى. وزبەك استاناسى سول تۇستا تۇركىستان ايماعىنىڭ ماڭىزدى شاھارى بولعان.
ۆلاديمير فەتيسوۆ، وزبەكستان جازۋشىلار وداعىنىڭ مۇشەسى:
- گەنەرال گۋبەرناتور كونستانتين كاۋفماننىڭ بۇيرىعىمەن شوقان ءۋاليحانوۆ قايتىس بولعاننان كەيىن ەسكەرتكىش قويىلادى. شوقان جايلى تولىققاندى پوۆەسىمدە وسى جايلى جازدىم. تاعى ءبىر قىزىقتى تۇسىنا توقتالعىم كەلەدى. 1918 -جىلى ريەۆوليۋتسيادان كەيىن شوقاننىڭ ەسكەرتكىشىن بازبىرەۋلەر ديىرمەن قۇرىلىسىنا العىسى كەلەدى. بالعامەن ۇرىپ جاتقاندا تاستىڭ ۇگىندىسى جاڭاعى ادامنىڭ كوزىنە كىرىپ، ءبىر اپتادان كەيىن الگى ادام قايتىس بولادى. ميستيكالىق وقيعا عوي.
ۆلاديمير فەتيسوۆتىڭ شوقان ءۋاليحانوۆ جايلى پوۆەستى «وزبەكستان جاڭالىقتارى» پورتالىنان ءۇزىندى بولىپ، اپتا سايىن جارىق كورەدى. تۋىندىدا تاشكەنت ارحيۆتەرىنەن تابىلعان قۇندى قۇجاتتار مەن اۋىزدان اۋىزعا جەتكەن ميستيكالىق وقيعالار باياندالادى. ەندىگىدە وزبەك جازۋشىسى قازاقتىڭ تۇڭعىش عالىمى جايلى كىتاپ شىعارۋدى ماقسات ەتىپ وتىر.
