بالالاردى مەكتەپكە قابىلداۋ ەرەجەسى وزگەردى
استانا. KAZINFORM – ەندى بالالاردى ءبىرىنشى سىنىپقا قابىلداۋ كەزىندە ليتسەيلەر مەن گيمنازيالارعا ەمتيحان وتكىزىلمەيتىن بولدى.
وقۋ-اعارتۋ مينيسترلىگى ورتا ءبىلىم كوميتەتىنىڭ ءتوراعاسى قانىبەك جۇماشەۆ 1-سىنىپقا قابىلداۋعا ەمتيحان وتكىزۋگە تىيىم سالىناتىن ەرەجە ەنگىزىلگەنىن مالىمدەدى، دەپ حابارلايدى inbusiness.kz سايتى.
ەندى بالالاردى ءبىرىنشى سىنىپقا قابىلداۋ كەزىندە ليتسەيلەر مەن گيمنازيالارعا ەمتيحان وتكىزىلمەيتىن بولدى.
«بىرىنشىدەن، زاڭعا ەنگىزىلگەن وزگەرىستەر وقۋشىلارعا باستاپقى ءبىلىمدى يگەرۋگە، تانىمدىق قابىلەتتەر مەن الەۋمەتتىك قارىم- قاتىناس داعدىلارىن دامىتۋعا تەڭ مۇمكىندىك بەرەدى. ەكىنشىدەن، تەستىلەۋگە، اڭگىمەلەسۋگە قاتىسۋدان پسيحولوگيالىق كۇيزەلىس، كونكۋرستىق ىرىكتەۋدى كۇتۋدەن جاعىمسىز تاجىريبەلەر جويىلادى. بۇل جاعداي بالانىڭ پسيحوەموتسيونالدى جاعدايىن ناشارلاتۋ جانە ونىڭ دەنساۋلىعىنا تەرىس اسەر ەتۋى مۇمكىن. ۇشىنشىدەن، كونكۋرستىق ىرىكتەۋ ناتيجەلەرىنە اتا- انالاردىڭ نارازىلىعى ازايادى. بالالاردى مەكتەپكە قابىلداۋ ءراسىمىنىڭ قوعامدىق رەزونانسى بولمايدى»، - دەدى قانىبەك جۇماشەۆ.
