وتىرعىزىلعان 120 ميلليون اعاش قۋراپ قالدى - دەپۋتات دابىل قاقتى
سەنات دەپۋتاتى نۇرلان بەكەنوۆ قازاقستان اۋماقتارىن كوگالداندىرۋ قارقىنى تومەن دەپ سانايدى. بۇل تۇرعىدا ول ەكولوگيا جانە تابيعي رەسۋرستار ءمينيسترى ەرلان نىسانبايەۆتىڭ اتىنا دەپۋتاتتىق ساۋال جولدادى.
سەناتور مەملەكەت باسشىسىنىڭ تاپسىرماسىنا سايكەس 2025 -جىلعا دەيىن بۇكىل ەلىمىز بويىنشا 2 ميلليارد اعاش وتىرعىزۋ قاجەت ەكەنىن اتاپ ءوتتى. ماسەلەن، 2021 -جىلى 138 ميلليون اعاش، 2022 -جىلى 280 ميلليون دانا اعاش وتىرعىزىلدى، ال بيىل 409 ميلليون اعاش وتىرعىزۋ جوسپارلانعان. الايدا، دەپۋتات كوشەتتەردىڭ ارى قاراي تامىر جايىپ كەتۋ كورسەتكىشى 70 پايىز شاماسىندا دەپ الاڭداپ وتىر. ياعني ءاربىر ءۇشىنشى بۇتا تامىر جايا الماي، قۋراپ قالادى.
«وسى رەتتە، 409 ميلليون كوشەتتىڭ كەم دەگەندە 120 ميلليونى تامىر جايا المايدى. بۇل بيۋدجەت قارجىسىن ءتيىمسىز جۇمساۋ ەكەنى بەلگىلى بولىپ وتىر. سوندىقتان بيۋدجەت شىعىنىن ازايتۋ كەرەك. وسىمدىكتەردىڭ تىرشىلىگىنە باقىلاۋ جانە تالداۋ نەگە جۇرگىزىلمەي جاتىر؟ مونيتورينگىنىڭ، وسىمدىكتەرگە كۇتىم جاساۋدىڭ جانە سۋارۋدىڭ زاماناۋي جۇيەسى نەگە ورناتىلماعان؟ بيۋدجەت قاراجاتىن ءتيىمسىز جۇمساعانى ءۇشىن جاۋاپكەرشىلىك قايدا؟»، - دەپ سۇرادى ن. بەكەنوۆ.
بۇدان بولەك سەناتور اعاشتاردى كەسۋ، قاساقانا وت قويۋ، سونداي- اق ورماندى جەرلەردى زاڭسىز باسىپ الۋ جانە پايدالانۋ، ورمان القاپتارىندا ۇيلەر مەن باسقا دا قۇرىلىستاردى سالۋ پروبلەماسىنا نازار اۋداردى. سوندىقتان ول ورماندار مەن كۋرورتتىق ايماقتارداعى بارلىق عيماراتتار مەن قۇرىلىستاردى تەكسەرۋدى ۇسىندى.
«وسىمدىكتەر مەن اعاشتاردى ءوسىرۋ، سونداي- اق ولارعا كۇتىم جاساۋ تاسىلدەرىن قايتا قاراۋ كەرەك دەپ سانايمىن. كوشەت وتىرعىزاتىن مەردىگەرلىك ۇيىمدارعا اعاشتاردى ودان ءارى مىندەتتى تۇردە كۇتىپ- باپتاۋ مەن جاي- كۇيىنە مونيتورينگ جاساۋ جانە ول تۋرالى ەسەپ بەرۋ ءتارتىبى بەكىتىلسىن. بۇل مىندەت قىزمەت كورسەتۋ شارتىندا كورسەتىلىپ، ولاردى ورىنداماعانى ءۇشىن جاۋاپكەرشىلىك تۋرالى تالاپپەن بىرگە جازىلۋى كەرەك»، - دەدى سەناتور.
ەسكە سالا كەتسەك، پرەزيدەنت ق. توقايەۆ 2020 -جىلعى قازاقستان حالقىنا جولداۋىندا 5 -جىلدا 2 ميلليارد ءتۇپ اعاش وتىرعىزۋ تۋرالى تاپسىرما بەرگەن بولاتىن.
اۆتور
رۋسلان عابباسوۆ
