وڭتۇستىكتىڭ شارۋالارى قىرىققابات ەگۋدى باستادى

جەتىسايدا قىرىققابات، كەلەستە كارتوپ ەگىپ جاتىر. كليماتى قولايلى ءوڭىردىڭ ديقاندارى قىسى-جازى تىنىم كورمەيدى.

قازىر ەككەن قىرىققاباتتى 60 كۇننەن كەيىن جيناپ، ساتۋعا شىعارادى. ەگىس القابىنا كوشەت ەگۋدى ەرتە باستاعانداردىڭ ءبىرى - رۋسلان قۇدايقۇلوۆ. يەلىگىندەگى 30 گەكتار القاپتىڭ جارتىسىنا ورامجاپىراق ەگىپ جاتىر. ديحان 10 جىلدان بەرى تامشىلاتىپ سۋارۋ ءادىسىن قولدانادى. «ونىڭ تيىمدىلىگىن كورگەلى قارجىمىز ۇنەمدەلدى»، - دەيدى ول.

رۋسلان قۇدايقۇلوۆ، جەكە كاسىپكەر:

- 10-15 جىلدان بەرى كاپۋستامەن اينالىسامىن. بىلتىر دا ەكتىك، 10 گەكتار ەكتىك. مىنە، بيىل سول جوبادا ەگىپ جاتىرمىز. 2014 -جىلدان بەرى تامشىلاتۋ ادىسمەن ەگىپ ءجۇرمىز. سەليترا، بارىنەن ەكونوم. الدىندا ارىقپەن ەككەندە توننالاپ سەليترا بەرەتىن ەدىك، گەكتارىنا 1-1,5 توننا بەرەتىن ەدىك. ال مىناعان 300-250 كەلىمەن پىسەدى كاپۋستا.

شارۋالار قىرىققاباتتىڭ ەرتە پىسەتىن «زاريسما» جانە «ۆاليكور» سورتىنىڭ جارتى ميلليون كوشەتىن ەگىپ جاتىر. 60 ءارى كەتسە 80 كۇندە العاشقى ءونىمدى جينايدى. وڭىردە قىسى-جازى القاپتا جۇمىس تا توقتامايدى. قىستا قىرىققابات ەگۋدەن باستالعان جۇمىس، قارا كۇزدە ماقتا تەرىمگە دەيىن جالعاسادى. ديقاندار: «ەڭبەك ەتەم دەگەنگە تابىس تا تابىلادى»، - دەيدى.

بيىل جەتىساي اۋدانىندا 80 مىڭ گەكتار جەرگە ءتۇرلى ءونىم ەگىلەدى. ونىڭ مىڭ جارىم گەكتارىنا ەرتە پىسەتىن قىرىققابات داقىلىن ەگۋ جوسپارلانعان. جەرگىلىكتى جاۋاپتىلار شارۋالارعا قولداۋ كورسەتۋ ءۇشىن ءونىمدى ساتىپ الۋشىلارمەن الدىن الا بايلانىس ورناتىپ وتىر.

قانات تىلەۋوۆ، ش. دىلدابەكوۆ اتىنداعى اۋىلدىق وكرۋگ اكىمى:

- شارۋا قوجالىقتارىمەن وسى باستان كەلىسىم جۇمىستارىن جۇرگىزىپ وتىرمىز. كورشى رەسەي ەلىنەن جانە قازاقستاننىڭ وزگە دە وبلىستارىنان ساتىپ الۋشى ىزدەپ جاتىر. بىلتىر جەتىسايلىق شارۋالار ءۇشىن جايلى جىل بولدى. ءونىم كولەمى ەسەلەنىپ، 550 مىڭ توننا باقشا ءونىمى مەن 90 مىڭ توننا كوكونىس جينادى. بيىل بۇل مەجەنى ارتتىرۋ ءۇشىن ديقاندار ەڭبەككە ەرتە كىرىستى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى