وڭتۇستىكتەن سولتۇستىككە: تۇركىستان تۇرعىندارى شىعىس قازاقستانعا ساپارعا شىقتى
تۇركىستان. KAZINFORM - قازاقستان رەسپۋبليكاسىنىڭ ەڭبەك جانە حالىقتى الەۋمەتتىك قورعاۋ مينيسترلىگى تاراپىنان بيىل وڭتۇستىكتەن سولتۇستىككە كوشۋشىلەر ءۇشىن 7050 كۆوتا ءبولىنىپ وتىر. سونداي-اق، قانداستار مەن قونىس اۋدارۋشىلار ءۇشىن مەملەكەتتىك قولداۋ كورسەتەتىن 7 وبلىس بەلگىلەندى.
بولىنگەن كۆوتا نەگىزىندە بيىلعى جىلدىڭ ءتورت ايىندا تۇركىستان وبلىسىنان 372 ادامى بار 107 وتباسى سولتۇستىك وبلىستارعا قونىس اۋداردى. اتاپ ايتار بولساق، شىعىس قازاقستان وبلىسىنا - 9 وتباسى، قوستاناي وبلىسىنا - 3 وتباسى، پاۆلودار وبلىسىنا 49 وتباسى، سولتۇستىك قازاقستان وبلىسىنا - 40 وتباسى، قاراعاندى وبلىسىنا 1 وتباسى، اباي وبلىسىنا 4 وتباسى، ۇلىتاۋ وبلىسىنا 1 وتباسى كوشكەن.
«بيىل مينيسترلىك تاراپىنان 7050 كۆوتا ءبولىنىپ وتىر. ول بويىنشا قونىس اۋدارۋشىلار 7 وبلىسقا بارا الادى. ياعني، سولتۇستىك قازاقستان وبلىسى - 2702، پاۆلودار وبلىسى - 2603، قوستاناي وبلىسى – 950، شىعىس قازاقستان وبلىسى – 372، اباي وبلىسى – 255، ۇلىتاۋ وبلىسى - 132، قاراعاندى وبلىسى - 36 ادام قابىلدايدى» - دەلىنگەن تۇركىستان وبلىسى ەڭبەك موبيلدىلىگى ورتالىعىنىڭ باسپا ءسوز قىزمەتى ۇسىنعان اقپاراتتا.
اتالعان باعدارلامانى جۇزەگە اسىرۋعا جەكە ازاماتتار دا ءوز ۇلەسىن قوسىپ كەلەدى. تۇركىستان وبلىسىنىڭ جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ ۇيىمداستىرۋىمەن «ۇلى كوش» قوزعالىسىنىڭ باسشىسى، وبلىستىق ءماسليحات دەپۋتاتى جاڭاباي اعابەكوۆتىڭ قولداۋىمەن شىعىس قازاقستان جانە اباي وبلىستارىنا ارنايى دەلەگاتسيا ساپارعا شىقتى.
اتالعان ساپاردىڭ باستى ماقساتى - ەكى وبلىسقا قونىس اۋدارۋعا نيەتتى ازاماتتاردى وڭىرلەردىڭ تىنىس- تىرشىلىگىمەن تانىستىرۋ. ءىس-شارا بارىسىندا كوشۋگە نيەتتى 30-دان استام تۇركىستاندىق شىعىس قازاقستان اۋماعىنداعى قونىس اۋداراتىن جەرلەردى كورىپ كەلەتىن بولادى.
«جالپى، 2015 -جىلدان بەرى جۇمىس كۇشى ازايعان سولتۇستىك وڭىرلەرگە حالقى تىعىز ورنالاسقان وڭتۇستىك ايماقتارىنان 14130 ادام نەمەسە 3187 وتباسى قونىس اۋداردى. مەملەكەت سولتۇستىك وبلىستارعا قونىس اۋدارعانداردىڭ وتباسى مۇشەلەرىنە ءبىر رەت 70 ا ە ك (258440 تەڭگە) مولشەرىندە اقشا جانە العاشقى ۋاقىتتا ءۇي جالداۋعا قارجى بەرەدى. بۇدان بولەك، بيلىك ولاردى قىسقا ۋاقىتقا كاسىبي وقۋعا جىبەرىپ، جۇمىسقا ورنالاستىرۋعا، جەڭىلدىكپەن باسپانا الۋعا كومەكتەسەدى. ال قونىس اۋدارعاندارعا جۇمىس ۇسىنعان جۇمىس بەرۋشىلەرگە 400 ا ە ك كولەمىندە (1476800 تەڭگە) سۋبسيديا تولەنەدى» - دەلىنگەن تۇركىستان وبلىسى ەڭبەك موبيلدىلىگى ورتالىعىنىڭ باسپا ءسوز قىزمەتى ۇسىنعان اقپاراتتا.
اۆتور
قايرات زاينيشيەۆ
