وڭتۇستىك كورەيانىڭ كونستيتۋتسيالىق سوتى پرەزيدەنت يۋن سوك يەلدى قىزمەتىنەن تايدىرۋدى قولدادى
استانا. KAZINFORM - بۇگىن، 4-ساۋىردە وڭتۇستىك كورەيانىڭ كونستيتۋتسيالىق سوتى پرەزيدەنت يۋن سوك يەلعا يمپيچمەنت جاريالاۋ ءىسى بويىنشا شەشىم شىعاردى، دەپ حابارلايدى Yonhap.
سوت پارلامەنتتىڭ مەملەكەت باسشىسىنا يمپيچمەنت جاريالاۋ تۋرالى شەشىمىن ءبىراۋىزدان قولدادى. وسىلايشا، يۋن سوك يەل اقىرى قىزمەتىنەن بوساتىلدى. ەلدە 60 كۇن ىشىندە كەزەكتەن تىس پرەزيدەنت سايلاۋى ءوتۋى ءتيىس.
سوتتىڭ مالىمەتىنشە، يۋن سوك يەل ءوزى ەنگىزگەن اسكەري جاعدايدىڭ جويىلۋىنا جول بەرمەۋ ءۇشىن ۇلتتىق جينالىس عيماراتىنا اسكەر جىبەرىپ، زاڭدى بۇزعان.
شەشىم پارلامەنت پرەزيدەنتتى ونىڭ 3-جەلتوقساندا اسكەري جاعداي ەنگىزۋىنە بايلانىستى ەل كونستيتۋتسياسى مەن زاڭدى بۇزدى دەپ ايىپتاپ، يمپيچمەنت جاريالاعان سوڭ ءتورت ايداي ۋاقىتتان كەيىن قابىلداندى.
ءىس قارالىپ جاتقان كەزدە سەۋلدە جانە ەلدىڭ باسقا ايماقتارىندا جاپپاي نارازىلىقتار ءوتتى. قوعام ەكىگە جارىلدى: بىرەۋلەر پرەزيدەنتتىڭ وتستاۆكاعا كەتۋىن تالاپ ەتسە، باسقالارى ونىڭ قىزمەتىنە قايتا ورالۋىن جاقتادى.
بۇعان دەيىن وڭتۇستىك كورەيا پوليتسياسى پرەزيدەنتتىڭ يمپيچمەنت بويىنشا ۇكىم جاريالانار الدىندا قاۋىپسىزدىكتى كۇشەيتكەنىن جازعان بولاتىنبىز.
اۆتور
زارينا تۋعانبايەۆا
