وڭتۇستىك كورەيانىڭ بۇرىنعى قورعانىس ءمينيسترى قاماۋعا الىندى

ءبىرىنشى تۇتقىنداۋ

سەۋل ورتالىق اۋداندىق سوتى كيم ەن حەندى پروكۋرورلار بۇلىككە قاتىستى «نەگىزگى» ارەكەتتەرگە قاتىستى جانە بيلىكتى اسىرا پايدالاندى دەپ ايىپتاعاننان كەيىن ونى قاماۋعا الۋ تۋرالى سانكسيا بەردى. بۇرىنعى قورعانىس ءمينيسترى وسى وقيعالارعا بايلانىستى رەسمي تۇردە قاماۋعا الىنعان العاشقى تۇلعا بولدى.

كيم ەن حەندى قاماۋعا الۋدى تالاپ ەتكەن پروكۋرورلار ونى «پرەزيدەنت يۋن سوك ەلمەن ۇلتتىق كونستيتۋتسيانى بۇزۋ ءۇشىن بۇلىك ۇيىمداستىردى» دەپ ايىپتادى.

كيم ەن حەن قورعانىس ءمينيسترى قىزمەتىن اتقارا وتىرىپ، يۋن سوك ەلعا اسكەري جاعداي جاريالاۋدى ۇسىنىپ، ۇلتتىق جينالىس (پارلامەنت) مەن ۇلتتىق سايلاۋ كوميسسياسىنىڭ شتاب- پاتەرىنە اسكەري قىزمەتكەرلەردى ورنالاستىرۋعا بۇيرىق بەردى دەگەن كۇدىككە ءىلىندى.

بۇعان قوسا، پروكۋرورلار بۇرىنعى قورعانىس ءمينيسترى پرەزيدەنتپەن اقىلداسا وتىرىپ، ۇلتتىق جينالىستىڭ وكىلەتتىكتەرىن كونستيتۋتسيالىق ەمەس شەكتەۋلەردى قامتيتىن اسكەري جاعداي تۋرالى جارلىق ازىرلەدى دەگەن كۇدىككە ءىلىندى.

حابارلانعانداي، جاۋاپ الۋ كەزىندە بۇرىنعى مينيستر پرەزيدەنتكە اسكەري جاعداي ەنگىزۋدى ۇسىنعانىن مويىندادى، الايدا ول ءوز ارەكەتىنىڭ زاڭسىز نەمەسە كونستيتۋتسياعا قايشى ەمەس ەكەنىن ايتتى.

بۇرىنعى قورعانىس باسشىسىن رەسمي تۇردە قاماۋعا الۋ يۋن سوك ەلعا قارسى كوتەرىلىسكە قاتىستى ايىپتاردى تەرگەۋدى تەزدەتەدى دەپ كۇتىلىپ وتىر.

ءوزىن-ءوزى ءولتىرۋ ارەكەتى

اگەنتتىكتىڭ حابارلاۋىنشا، كيم ەن حەن سەۋلدىڭ شىعىسىنداعى ۋاقىتشا ۇستاۋ وقشاۋلاعىشىندا ءوز-وزىنە قول جۇمساماق بولعان. بۇل ارەكەتى ساتسىزدىككە ۇشىراعاننان كەيىن بۇرىنعى قورعانىس ءمينيسترى كۇزەتىلەتىن كامەراعا اۋىستىرىلدى، ونىڭ جاعدايى تۇراقتى.
قاتاڭ جازا

وڭتۇستىك كورەيا زاڭى بويىنشا، بۇلىك كوشباسشىسى دەپ تانىلعان ادام ءولىم جازاسى نەمەسە ءومىر بويىنا باس بوستاندىعىنان ايىرىلۋى مۇمكىن. سونداي-اق قاستاندىق جاساۋشىلار نەمەسە «نەگىزگى» ارەكەتتەردى جاساعاندار ءولىم جازاسىنا كەسىلۋى، ءومىر بويىنا نەمەسە كەمىندە بەس جىلعا باس بوستاندىعىنان ايىرىلۋى مۇمكىن.

بۇل رەتتە، Yonhap اگەنتتىگى اتاپ وتكەندەي، پرەزيدەنت زاڭعا سايكەس، بۇلىك شىعارعان جاعدايلاردى قوسپاعاندا، قىزمەتتە بولعان كەزدە قىلمىستىق قۋدالاۋدان يممۋنيتەتكە يە.

بۇعان دەيىن وڭتۇستىك كورەيانىڭ ۇلتتىق اسسامبلەياسى وتكەن اپتادا اسكەري جاعداي ەنگىزۋ ارەكەتىنە قاتىستى يۋن سوك ەل مەن جەتى شەنەۋنىكتى تەز ارادا قاماۋعا الۋدى تالاپ ەتەتىن قارار قابىلدادى.

سونداي-اق وڭتۇستىك كورەيا پارلامەنتى پرەزيدەنت يۋن سوك ەلعا قاتىستى ايىپتاۋلاردى تەكسەرۋ ءۇشىن ارنايى پروكۋرور تاعايىنداۋ تۋرالى زاڭ جوباسىن قابىلدادى.

بۇعان دەيىن وڭتۇستىك كورەيا پرەزيدەنتىنە ساپارعا شىعۋعا تىيىم سالىندى. ەلدەن شىعۋعا تىيىم سالۋ يۋن سوك ەل جاريالاعان اسكەري جاعدايعا بايلانىستى تەرگەۋ امالدارى ءۇشىن قاجەت بولدى.

ەسكە سالا كەتسەك، وڭتۇستىك كورەيانىڭ پروكۋراتۋراسى پرەزيدەنتكە قارسى مەملەكەتكە وپاسىزدىق جاسادى دەگەن ايىپ تاعىپ وتىر. وڭتۇستىك كورەيانىڭ بۇرىنعى قورعانىس ءمينيسترى دە مەملەكەتكە وپاسىزدىق جاسادى دەگەن ايىپپەن قاماۋعا الىندى.

سونىمەن قاتار، ۇلتتىق جينالىس پلەنارلىق وتىرىستا پرەزيدەنتكە يمپيچمەنت جاريالاۋ تۋرالى ۇسىنىسقا داۋىس سالدى. بيلىكتەگى «حالىقتىق بيلىك» پارتياسىنىڭ (ح ب پ) ءۇش زاڭ شىعارۋشىسىنان باسقاسى يمپيچمەنت تۋرالى ۇسىنىسقا داۋىس بەرۋگە بويكوت جاريالادى.

اۆتور

زارينا تۋعانبايەۆا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى