وڭتۇستىك كورەيالىق كومپانيا ا ق ش-قا $21 ميلليارد ينۆەستيتسيا سالماق
استانا. KAZINFORM - وڭتۇستىك كورەيالىق Hyundai كومپانياسى تاريفتەردەن جالتارۋ جانە ترامپتىڭ 2-ساۋىردە ەنگىزەتىن باج سالىعىنان قۇتىلۋ ماقساتىندا ينۆەستيتسيا جاساۋعا شەشىم قابىلدادى.
وڭتۇستىك كورەيالىق Hyundai كونگلومەراتى ا ق ش-قا $21 ميلليارد كولەمىندە ينۆەستيتسيا سالاتىنىن مالىمدەدى. بۇل قاراجاتتىڭ ءبىر بولىگى لۋيزيانا شتاتىندا $5,8 ميلليارد تۇراتىن بولات قۇيۋ زاۋىتىن سالۋعا باعىتتالماق.
NBC News مالىمەتىنشە، زاۋىتتا 1400-دەن استام جۇمىس ورنى اشىلادى. وندا وندىرىلەتىن جاڭا بۋىن بولاتى Hyundai-دىڭ ا ق ش-تاعى ەكى اۆتوزاۋىتىندا ەلەكتروموبيل جاساۋعا پايدالانىلادى.
ينۆەستيتسيا تۋرالى دۇيسەنبى كۇنى اق ۇيدە ا ق ش پرەزيدەنتى دونالد ترامپ، Hyundai ءتوراعاسى ىيسۋن چۋنگ جانە لۋيزيانا گۋبەرناتورى دجەفف لەندري بىرلەسىپ مالىمدەدى.
Hyundai Motor كومپانياسىنىڭ باس ديرەكتورى حوسە مۋنوستىڭ سوزىنشە، تاريفتەرگە توتەپ بەرۋدىڭ ەڭ ءتيىمدى جولى - جەرگىلىكتى ءوندىرىستى ۇلعايتۋ.
Hyundai – ا ق ش- تاعى ەلەكتروموبيلدەر ساتىلىمى بويىنشا كوشباسشىلاردىڭ ءبىرى جانە تىكەلەي Tesla-مەن باسەكەگە تۇسەدى. كومپانيانىڭ الاباما جانە دجوردجيا شتاتتارىندا ەكى ءىرى اۆتوزاۋىتى بار.
وڭتۇستىك كورەيا – ا ق ش-تىڭ ساۋدا تاپشىلىعى بار ەلدەرىنىڭ ءبىرى. ناۋرىز ايىنىڭ باسىندا ترامپ سەۋلدىڭ امەريكالىق تاۋارلارعا جوعارى سالىق سالاتىنىن ايتىپ، وڭتۇستىك كورەيانىڭ تاريفتەرى ا ق ش تاريفتەرىنەن ءتورت ەسە جوعارى ەكەنىن مالىمدەگەن.
