وڭتۇستىك كورەياداعى زاڭدى جۇمىس: قازاقستانمەن ارادا كەلىسىم قاشان بەكىتىلەدى
استانا. KAZINFORM - ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا وڭتۇستىك كورەياداعى قازاقستان ازاماتتارىنىڭ زاڭدى جۇمىس ىستەۋىنە جاعداي جاساۋ مۇمكىندىگىنە تۇسىنىك بەردى.
ايتا كەتەيىك، قازاقستاندىقتار كورەيا رەسپۋبليكاسىنا جۇمىس ىستەۋگە باراردا سەرتيفيكاتسيا راسىمدەرىنەن ءوتۋى كەرەك. ەڭبەك مينيسترلىگى ەلىمىزدىڭ ءۇش وڭىرىندە ءتيىستى ورتالىقتاردى دايىنداپ قويعان.
- ءۇش ورتالىق ىسكە قوسۋعا تولىق دايىن. وڭتۇستىك كورەيا جاعىمەن كەلىسىمگە قول قويۋدى كۇتىپ وتىرمىز. بىلتىر اتالعان ەلمەن ءتيىستى مەموراندۋمدى بەكىتتىك، ونىڭ اياسىندا قازىر وسى كەلىسىمدى دايىنداپ جاتىرمىز. بۇل قۇجات جوباسى كورەيانىڭ ەڭبەك مينيسترلىگىمەن كەلىسىلىپ جاتىر، - دەدى س. جاقىپوۆا ەلوردادا سەنات جانىنداعى ماسليحاتتارمەن ءوزارا ءىس- قيمىل جونىندەگى كەڭەستىڭ وتىرىسى اياسىندا تىلشىلەر سۇراعىنا جاۋاپ بەرە وتىرىپ.
ونىڭ ايتۋىنشا، كەلىسىمگە قول قويىلعاننان كەيىن، ورتالىقتار دايىندىق جۇمىستارىن باستايدى. وڭتۇستىك كورەيا تاراپى قازاقستان جۇمىسشىلارىنا كاسىبى پەن ماماندىعى بويىنشا تالاپتار قويادى.
- ولار بىزگە تالاپتار ءتىزىمىن بەرۋى كەرەك، سول ءتىزىم بويىنشا بۇل ورتالىقتاردى ىسكە قوسامىز. ولار شىعىس قازاقستان مەن تۇركىستان وبلىستارىندا جانە الماتى قالاسىندا جاساقتالدى. وقىتۋ اقىلى بولادى. سىرتقى ىستەر مينيسترلىگىمەن بىرلەسە جۇمىس ءجۇرىپ جاتىر. اتالعان قۇجات قازاقستاننىڭ بارلىق مەملەكەتتىك ورگاندارىمەن كەلىسىلدى، - دەدى مينيستر.
ۆەدومستۆو باسشىسىنىڭ پايىمىنشا، بيىل ءبىرىنشى جارتىجىلدىقتا اتالعان قۇجات بەكىتىلۋى مۇمكىن.
ەسكە سالساق، بىلتىر كۇزدە سۆەتلانا جاقىپوۆا وڭتۇستىك كورەيادا 15 مىڭ قازاقستان ازاماتى زاڭسىز جۇرگەنىن ايتتى.
