وڭتۇستىك كورەيادا روبوت قوراپپەن شاتاستىرىپ، ادامدى ءولتىردى
وڭتۇستىك كورەيادا روبوت ادامدى كوكونىس سالىنعان قوراپتان اجىراتا الماي ەزىپ، ءولتىرىپ العان. Kazinform بۇل تۋرالى BBC گە سىلتەمە جاساپ حابارلايدى.
40 جاستاعى روبوتوتەحنيكا كومپانياسىنىڭ قىزمەتكەرى روبوتتى تەكسەرىپ جاتقاندا جۇيە جۇمىسى بۇزىلعان.
وڭتۇستىككورەيالىق Yonhap اقپارات اگەنتتىگىنىڭ حابارلاۋىنشا، روبوت ەر ادامدى كوكونىس سالىنعان قوراپپەن شاتاستىرىپ، ونى ۇستاپ الىپ، كونۆەيەرلىك تاسپاعا جاقىنداتىپ، بەتى مەن كەۋدەسىن ەزىپ جىبەرگەن.
قىزمەتكەردى اۋرۋحاناعا جەتكىزگەنىمەن، امان الىپ قالا المادى.
Yonhap دەرەگى بويىنشا، قايعىلى جاعداي بۇرىشتى سورتتاۋ زاۋىتىندا بولعان. قازا تاپقان ەر ادام 8-قاراشاعا جوسپارلانعان تەستىلەۋ الدىندا روبوت جۇمىسىن تەكسەرىپ جاتقان بولاتىن. روبوت بۇرىش سالىنعان جاشىكتى كوتەرىپ، پاللەتكە قويۋى كەرەك. اۋەلى سىناق 6-قاراشاعا جوسپارلانعان، ءبىراق روبوتتا قيىندىقتار تۋىنداپ، كەيىنگە قالدىرىلعان.
سارسەنبى كۇنى كەشكە روبوت- قولدى جاساعان كومپانيا قىزمەتكەرى ماشينانى تەكسەرىپ جاتقان ساتتە جۇيەدە ىركىلىس بولادى.
زاۋىت يەسى - Donggoseong اۋىلشارۋاشىلىق كەشەنىنىڭ رەسمي وكىلى مالىمدەمە جاساپ، «ناقتى ءارى قاۋىپسىز» جۇيە جاساۋعا شاقىردى.
وڭتۇستىك كورەيادا ناۋرىزدا وسىعان ۇقساس جاعداي بولعان. اۆتوكولىك بولشەكتەرىن شىعاراتىن زاۋىتتىڭ 50 جاستاعى جۇمىسشىسى روبوت- قولدىڭ جولىندا قالىپ، اۋىر جاراقات العان بولاتىن.
