وڭتۇستىك كورەيا سوتى پرەمەر-ءمينيستردىڭ مىندەتىن اتقارۋشىعا يمپيچمەنت جاريالاۋ تۋرالى ءوتىنىشتى قابىلدامادى
استانا. KAZINFORM - كورەيا رەسپۋبليكاسىنىڭ كونستيتۋتسيالىق سوتى ۇلتتىق اسسامبلەيانىڭ (پارلامەنت) ۋاجدەرىمەن كەلىسپەي، پرەمەر-مينيستر حان دوك سۋعا يمپيچمەنت جاريالاۋدان باس تارتتى، دەپ حابارلايدى تاسس.
- 24- ناۋرىزدا كونستيتۋتسيالىق سوت پرەمەر-مينيستر حان دەوك سۋعا قاتىستى يمپيچمەنت تۋرالى ءوتىنىشتى قابىلداماۋ تۋرالى شەشىم قابىلداعانىن جاريالادى، - دەپ حابارلادى سوتتىڭ باسپا ءسوز قىزمەتى.
پرەمەر-مينيسترگە يمپيچمەنت جاريالاۋدى سەگىز سۋديانىڭ بىرەۋى عانا قولدادى. ناتيجەسىندە حان دۋك سۋ قىزمەتىنە قايتا ورالدى جانە وعان پرەزيدەنت مىندەتىن اتقارۋشى مارتەبەسى دە قايتارىلدى.
- كونستيتۋتسيالىق سوتتىڭ بەس سۋدياسى يمپيچمەنتتى قابىلداماۋ قاجەت دەپ ساناسا، بىرەۋى قولدادى، تاعى ەكەۋى ءوتىنىشتى قاناعاتتاندىرۋدان باس تارتۋدى (فورمالدى نەگىزدىڭ جوقتىعىنا بايلانىستى) قاجەت دەپ تاپتى، - دەلىنگەن جاريالانىمدا.
اتاپ وتىلگەندەي، كەيبىر ساراپشىلاردىڭ پىكىرىنشە قازىرگى شەشىم وڭتۇستىك كورەيا پرەزيدەنتى يۋن سوك ەلعا وسىعان ۇقساس ءىس بويىنشا قانداي ۇكىم شىعارىلۋى مۇمكىن ەكەندىگىنىڭ كورسەتكىشى بولۋى مۇمكىن.
ەسكە سالا كەتسەك، يۋن سوك يەل ەلدە اسكەري جاعدايدىڭ ەنگىزىلۋىنە بايلانىستى كوتەرىلىس جاسادى دەگەن ايىپپەن ۇستالعان ەدى.
وڭتۇستىك كورەيا پرەزيدەنتى ارتىنشا اسكەري جاعداي ەنگىزگەنى ءۇشىن كەشىرىم سۇرادى.
سودان كەيىن پارلامەنت پرەزيدەنتكە يمپيچمەنت جاريالادى.
سەۋل سوتى يۋن سوك يەلدى قاماۋعا الۋ تۋرالى وردەر شىعاردى.
كەيىن وڭتۇستىك كورەيا پرەزيدەنتى تەرگەۋ يزولياتورىنان بوساتىلدى.
