وڭتۇستىك كورەيا پرەزيدەنتىنىڭ مىندەتىن اتقارۋشى سايلاۋدى ءادىل وتكىزۋگە ۋادە بەردى
استانا. KAZINFORM - كورەيا پرەزيدەنتىنىڭ مىندەتىن اتقارۋشى پرەمەر-مينيستر حان دوك سۋ جاڭا مەملەكەت باسشىسىنىڭ كەزەكتەن تىس سايلاۋىن «ءادىل جانە ادال» ءوتۋىن قامتاماسىز ەتۋگە نيەتتى، دەپ حابارلايدى ت ا س س.
- 60 كۇن ىشىندە وتەتىن كەلەسى پرەزيدەنتتىك سايلاۋ ءادىل جانە ادال بولۋى كەرەك، - دەدى پرەمەر-مينيستر كابينەت مۇشەلەرىمەن كەزدەسۋدە.
ول مەملەكەتتىك ورگانداردى ساياسي تۇرعىدا بەيتاراپ بولۋعا شاقىردى.
- مەن كەلەسى ۇكىمەت زاڭ مەن كونستيتۋتسياعا سايكەس جۇمىستى ۋاقتىلى باستاۋى ءۇشىن كەزەكتى پرەزيدەنتتىك سايلاۋدى وتكىزۋگە بار كۇشىمدى سالامىن. پرەزيدەنتتىڭ مىندەتىن اتقارۋشى رەتىندە مەن ۇلتتىق قاۋىپسىزدىك پەن حالىقارالىق قاتىناستارداعى قىسىمدى بولدىرماۋ ماقساتىندا قاۋىپسىزدىك سالاسىندا تولىق دايىندىقتى قامتاماسىز ەتەمىن، - دەدى حان دوك سۋ حالىققا جاريالاعان ۇندەۋىندە.
سونىمەن قاتار، حان دوك سۋ وتانداستارىنا ا ق ش- پەن ساۋدا كەلىسپەۋشىلىكتەرى سياقتى «قازىرگى پروبلەمالارعا» كەلىسىلگەن تۇردە جاۋاپ بەرۋگە، سونداي-اق قوعامدىق ءتارتىپتى ساقتاۋعا ۋادە بەردى.
وسىعان دەيىن بۇگىن وڭتۇستىك كورەيانىڭ كونستيتۋتسيالىق سوتى پرەزيدەنت يۋن سوك ەلعا يمپيچمەنت جاريالاۋ ءىسى بويىنشا شەشىم شىعارعانىن جازعان ەدىك.
