وتباسىلىق كەلىسپەۋشىلىكتىڭ ءبارىن تۇرمىستىق زورلىق-زومبىلىققا جاتقىزۋعا بولمايدى - بايان احاتاي
وتباسىلىق كەلىسپەۋشىلىكتىڭ ءبارىن تۇرمىستىق زورلىق-زومبىلىققا جاتقىزۋعا بولمايدى. مۇنداي پىكىردى قازاقستان حالقى اسسامبلەياسىنىڭ «انالار» كەڭەسى ءتوراعاسىنىڭ ورىنباسارى بايان احاتاي ءبىلدىردى، دەپ حابارلايدى Kazinform.
«ايەل زاتىنا مۇلدەم قول كوتەرۋگە بولمايدى. دەگەنمەن، ءتۇرلى جاعداي بولادى. قازاقستاندا قانداي داعدارىس ورتالىعى بولسا، سولاردىڭ بارلىعىندا دەرلىك بولدىق. سول كەزدەرى ءبىر-ەكى داعدارىس ورتالىعىنىڭ باسشىسى: «مىنا ايەلدەردىڭ مىنەزىن كورگەن كەزدە ءوزىڭ ۇرىپ جىبەرگىڭ كەلەدى» دەگەن ەدى. ياعني، كەي جاعدايدا ايەلدەرىمىز دە ەر ادامدى ماجبۇرلەيدى. ەر ادامنىڭ سابىرلىعى قانشالىقتى ەكەنىن بىلمەيمىز. ەر ادام دا، ايەل دە نەكەگە ءاربىر ءسوزى مەن ءىسىنىڭ ارتى نەگە شاباتىنىن ءتۇسىنىپ، جاۋاپكەرشىلىكپەن وتىرۋى ءتيىس. ال كۇندەلىكتى وتباسىلىق كەلىسپەۋشىلىكتىڭ ءبارىن تۇرمىستىق زورلىق-زومبىلىققا جاتقىزا بەرۋگە بولمايدى»، - دەدى بايان احاتاي اگەنتتىك تىلشىسىنە بەرگەن سۇحباتىندا.
ونىڭ اتاپ وتۋىنشە، ادامنىڭ ار-نامىسىنا تيەتىن نارسەلەر ۇنەمى قايتالانىپ وتىرماۋى قاجەت.
«جۇيەلى تۇردە قايتالاناتىن ار-نامىسقا تيەتىن سوزدەر، بوقتىق سوزدەر قالىپتى جاعداي بولماۋى ءتيىس. ماسەلەن، وڭتۇستىكتە انادان بوقتايدى. بۇل قالىپتى جاعداي سياقتى. ول قالىپتى جاعداي بولماۋى قاجەت. انا دەگەن قاسيەتتى ۇعىم. جابايى قارىم-قاتىناس تۇرلەرى كەلمەسكە كەتۋى كەرەك. وكىنىشكە قاراي، قازىرگى قوعامدا ءتۇرلى وقىس جاعدايلار زورلىق-زومبىلىق سالدارىنان بولىپ جاتىر. 2022 -جىلدىڭ ستاتيستيكاسىنا جۇگىنەر بولساق، 1 جىلدىڭ ىشىندە 70 ايەل تۇرمىستىق زورلىق-زومبىلىقتان باقيلىق بولعان. سوندىقتان ءبىز تۇجىرىمدامالىق زاڭنامالار شىققانعا دەيىن كەز كەلگەن دابىلعا ارەكەت ەتۋگە ءتيىسپىز. بۇل مىندەتتى دە. ويتكەنى ونىڭ ارتىندا ادام تاعدىرى تۇر. ءتىپتى، جالعان نە بولماشى نارسەگە شالىنعان قوڭىراۋ بولسا دا ول انىقتالۋى قاجەت»، - دەدى كەڭەس ءتوراعاسىنىڭ ورىنباسارى.
ايتا كەتەيىك، ەلوردادا ورتالىق ازيا وڭىرىندە ايەلدەر مەن قىزدارعا قاتىستى جاسالاتىن زورلىق-زومبىلىقتىڭ الدىن الۋعا ەر-ازاماتتارى جۇمىلدىرۋ سالاسىنداعى ۇلتتىق الەۋەتتى نىعايتۋعا باعىتتالعان وڭىرلىك سەمينار-ترەنينگ ءوتىپ جاتىر.
