وتاندىق كىتاپ باسىپ شىعارۋ ءىسىن سۋبسيديالاۋ فورماتىن وزگەرتۋ قاجەت - ايدوس سارىم

«كىتاپ وقيتىن ەل قالىپتاستىرۋ - پرەزيدەنت ايقىنداعان كۇن تارتىبىندەگى باسىمدىقتاردىڭ ءبىرى. بيىلعى قۇرىلتايدا پرەزيدەنت مەملەكەتتىك باسقارۋدىڭ بارلىق دەڭگەيىندە كەشەندى شارالار قابىلداۋ قاجەتتىگىن اتاپ كورسەتىپ، كىتاپ وقيتىن ەل جوباسىنا قايتا توقتالدى. مەملەكەت باسشىسىنىڭ وسى ماسەلەگە ەرەكشە نازار اۋدارۋىنىڭ سەبەبى — كىتاپ وقۋ ۇلتتىڭ دامۋى مەن باسەكەگە قابىلەتتىلىگىنىڭ نەگىزگى شارتى ەكەندىگىمەن بايلانىستى. بۇل رەتتە، وتاندىق اۆتورلار مەن باسپاگەرلەردى مەملەكەتتىك قولداۋدا باسىمدىقتىڭ وقۋلىقتار مەن ادەبيەتتەردى باسىپ شىعارۋعا تاپسىرىس بەرۋمەن عانا شەكتەلىپ وتىرعانى الاڭداتادى. بۇگىندە دۇكەندەردە كىتاپ سورەلەرىندە ۇلتتىق ادەبيەت پەن كىتاپتار سانى ارتقانىمەن، بۇل جۇمىس تىم باياۋ جۇرگىزىلۋدە. سوندىقتان مەملەكەت باسشىسىنىڭ تاياۋدا وتكەن ۇلتتىق قۇرىلتايدا وسىعان قاتىستى بەرگەن تاپسىرماسىن نەگىزگە الا وتىرىپ، قولدانىستاعى مەملەكەتتىك باعدارلامالار مەن جوبالارعا تۇزەتۋ ەنگىزۋ قاجەت دەپ سانايمىز»، - دەدى ءماجىلىس دەپۋتاتى.

وسىعان وراي ايدوس سارىم اتالعان شارا مىناداي باعىتتاردى قامتۋ قاجەتتىگىن اتادى:

— وتاندىق كىتاپ باسىپ شىعارۋ ءىسىن سۋبسيديالاۋ فورماتىن وزگەرتۋ؛

— كىتاپ يندۋسترياسى مەن كىتاپقۇمارلار قوعامىنىڭ ينفراقۇرىلىمىن قايتا قۇرۋ؛

— قالالار مەن اۋىلداردىڭ الەۋمەتتىك- مادەني ستاندارتتارىن وزگەرتىپ، وقىرماندار مەن تۇرعىنداردىڭ سانىنا شاققانداعى كىتاپ دۇكەندەرى مەن دۇڭگىرشەكتەردىڭ قاجەتتى كولەمىن انىقتاۋ؛

— قاراپايىم قاعازدان باستاپ، پوليگرافيالىق جابدىققا دەيىن يمپورتقا ءجۇز پايىز تاۋەلدى كىتاپ يندۋسترياسى سالاسىنا ەكونوميكالىق تۇرعىدان ىنتالاندىرۋ؛

— اۆتورلىق سىياقى تولەۋ قاعيدالارىن، ونىڭ مولشەرى مەن تولەۋ ءتارتىبىن ازىرلەۋ جانە بەكىتۋ؛

— كىتاپقا دەگەن قىزىعۋشىلىقتى وتباسىندا قالىپتاستىرۋ؛

— كىتاپ وقۋ ادەتىن مەكتەپ قابىرعاسىنان باستاپ دامىتۋ؛

— مەكتەپ كىتاپحانا جەلىسى بويىنشا جۇيەلى جۇمىس جۇرگىزۋ.

«پرەزيدەنتىمىز قوعامدا پاتريوتيزم، جاسامپازدىق، زاڭعا، اعا بۋىن دەگەن قۇرمەت سياقتى جانە باسقا دا قۇندىلىقتاردى قالىپتاستىرۋ مىندەتىن ۇنەمى ايتىپ كەلەدى. بۇعان كوبىنە كىتاپ وقۋ ارقىلى عانا قول جەتكىزۋگە بولادى. بارلىق مەملەكەتتىك ورگاندار وسىنى قاپەرلەرىنە الۋلارى قاجەت. سوۆەت زامانىندا، قازاق جازۋشىلارىنىڭ تۋىندىلارى جۇزدەگەن مىڭ تيراجبەن، ال ەڭ تانىمال قازاق گازەت- جورنالدارى 500-600 مىڭ تيراجبەن تارايتىن كەزەڭدى دە كوردىك. ەلىمىز تاۋەلسىزدىگىن الىپ، حالىق سانى ەسەلەپ ارتقان زاماندا بۇنداي جاعداي قايتالانبايدى دەگەننىڭ ءوزى اسقان قاتەلىك! بۇعان تەك جۇيەلى، تاباندى جۇمىس اتقارۋىمىز شارت! جالپى العاندا، فراكتسيامىزدىڭ دەپۋتاتتارى ءوز تاراپىنان قاجەتتى زاڭنامالىق شارالار ارقىلى وتاندىق كىتاپ شىعارۋدى ينستيتۋتسيونالدىق تۇرعىدان نىعايتۋ ءۇشىن ۇكىمەتكە جاردەم كورسەتۋگە دايىن وسىلايشا، مەملەكەت باسشىسىنىڭ تاپسىرماسى تولىققاندى ىسكە اسىرىلۋى كەرەك»، - دەدى ايدوس سارىم.

اۆتور

مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى