وتاندىق عالىمدار اۋا تازارتقىش فيلتر دايىنداپ جاتىر

قازگيدرومەتتىڭ حابارلاۋىنشا، بۇعان - قولايسىز مەتەورولوگيالىق جاعدايلار سەبەپ. 2060-جىلعا دەيىنگى كومىرتەكتى بەيتاراپتىلىققا قول جەتكىزۋ ءۇشىن قازىردەن باستاپ زاماناۋي تەحنولوگيانى قولدانىسقا ەنگىزۋ قاجەت. استانالىق عالىمدار بۇل رەتتە اۋا تازارتقىش فيلتردى جاساپ شىعارعان.

اقپاننىڭ 18-ءى، تۇسكى ساعات 12:00-لەر شاماسى. استاناداعى اۋانىڭ لاستانۋ يندەكسى شامامەن 50-ءدى كورسەتىپ تۇر. بۇل دەگەنىمىز، وكپەگە تۇسەتىن ۇساق ميكروبولشەكتەر، كومىرقىشقىل گازى، شاڭ، مەتالل، ازوت ديوكسيدى مەن كومىرتەك توتىعىنىڭ مولشەرى نورمادان جوعارىراق. دەمەك، اسا سەزىمتال جانە تىنىس الۋ جولدارىنىڭ اۋرۋىنا شالدىققان جانداردىڭ ءدال قازىر دالادا جۇرمەگەنى ابزال.

مەتەورولوگيالىق فاكتورلاردىڭ اسەرىنەن اۋانى لاستايتىن زياندى زاتتار كونسەنتراتسياسى ارتا تۇسەدى. ءال-فارابي اتىنداعى قازۇۋ مەتەورولوگيا جانە گيدرولوگيا كافەدراسىنىڭ اعا قىزمەتكەرى مادينا تۇرسىنبايەۆانىڭ ايتۋىنشا، جەلدىڭ ەكپىنى، ىلعال مولشەرى، قىسىم سياقتى ولشەمدەردىڭ ءبارى زياندى زاتتاردىڭ اۋادا تارالۋىنا تىكەلەي اسەر ەتەدى.

مادينا تۇرسىنبايەۆا، ەكولوگ عالىم:

- لاستاعىش زاتتاردىڭ كونسەنتراتسياسى كوپ جاعدايدا اۋاداعى قوزعالىستارعا بايلانىستى. ياعني جەل تۇرماسا، اۋانىڭ كولدەنەڭ قوزعالىسى باياۋلايدى. سونداي-اق اتموسفەرالىق شەكارانىڭ تومەندەۋى دە ىقپال ەتەدى. مۇندايدا اتموسفەرالىق قىسىم جوعارىلاپ، اۋاداعى اعىمدار باسەڭدەپ، زياندى قالدىقتاردىڭ كونتسەنتراتسياسى كۇرت ارتادى.

ەكولوگيانى جاقسارتۋ ماقساتىندا قازاقستاندىق عالىمدار ارنايى جوباعا كىرىسكەن. قازىر ەۋرازيا ۇلتتىق ۋنيۆەرسيتەتىنىڭ زەرتحاناسىندا اۋا تازارتقىش فيلتر ازىرلەنىپ جاتىر. بۇل كومىرقىشقىل گازىنىڭ اتموسفەراعا تارالۋىن بولدىرماۋدىڭ ءبىر امالى، دەيدى عالىمدار.

ايگەرىم شاقايەۆا، جوبا اتقارۋشىسى:

- ول ءۇشىن ءبىز سۇزگىش مەمبرانالار مەن ورگانيكالىق مەتالل قاڭقالارىن قوسىندىسىن دايىنداپ جاتىرمىز. وسى ەكەۋى دە سىڭىرگىش ماتەريال سانالادى. ياعني كومىرقىشقىل گازىن سورۋ قاسيەتىنە يە. وسىلاي ءبىز مەمبرانانى سىڭىرگىش- توسەمە ماتەريال رەتىندە قولدانىپ، يكەمدى ءارى ىقشام فيلتر جاساپ شىعارامىز. عىلىمي جوبانىڭ مەرزىمى - بەس جىل. وسى ۋاقىتتا جان-جاقتى زەرتحانالىق سىناق جۇرگىزىلەدى. بارلىق تەكسەرىستەن ءساتتى ءوتىپ، تيىمدىلىگى دالەلدەنسە - وندىرىستىك ايماقتارعا ورناتۋ مۇمكىندىگى قاراستىرىلماق.

ايتا كەتەيىك، قازاقستان كومىرقىشقىل گازىنىڭ ءبولىنىسى جونىنەن 89 مەملەكەتتىڭ ىشىندە 47-ورىندا تۇر. ەكولوگتار زاماناۋي سۇزگىشتەردەن بولەك، قاتتى وتىننان بالامالى ەنەرگيا كوزدەرىنە كوشۋ كەرەگىن ايتادى.

24.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى