وتانداسىمىز وڭتۇستىك كورەيادا قازى جاسايتىن سەح اشتى

تارازدىڭ تۋماسى دميتري پياك وسى ەلدە جىلقى ەتىنەن شۇجىق جاسايدى. 

ۆلاديسلاۆ سوي، ءتىلشى:

 - وڭتۇستىك كورەيادا قازى، مىنە، وسىلاي جاساپ شىعارىلادى. دايىن ءونىم مەتالل قالدىقتارىنىڭ بار- جوعىنا تەكسەرىلەدى. ەگەر قۇرامىنان انىقتالىپ جاتسا، جارامسىز دەپ تانىلادى. بۇل ەلدە ەت ونىمدەرىن وندىرۋگە قويىلاتىن سانيتارلىق تالاپتار وتە قاتاڭ. سەح قىزمەتكەرلەرىنىڭ بارلىعى ارنايى كيىم كيۋگە مىندەتتى. ءوندىرىس ورنىندا نولدەن تومەن تەمپەراتۋرا ساقتالۋى ءتيىس. بارلىق تالاپتاردى ورىنداماي جانە ارنايى جابدىقسىز ەت ونىمدەرىن شىعارۋعا رۇقسات الۋ مۇمكىن ەمەس.

دميتري پياك، كاسىپكەر:

 - ءبىز تاعام وندىرىسىنەن حابارى بار كەڭەسشى جالدادىق. قازى سىرتتاي شۇجىققا ۇقسايدى عوي. سوندىقتان ءبىز شۇجىق ءوندىرۋ ءتاسىلىن نەگىزگە الدىق. ونى دايىنداۋ ءادىسىمىز وڭتۇستىكقازاقستاندىق دەسەم بولادى. ءبىز ول جاقتا تۇرعاندا قازىنى ءوزىمىز ءجيى جاسايتىنبىز. اجەم ازىرلەيتىن، مەن دە كومەكتەسەتىنمىن. رەتسەپتى قاراپايىم - تۇز، سارىمساق، قارا بۇرىش، ەت، ءبارىن ارالاستىرىپ، ىشەككە سالامىز.

 35 جاستاعى كاسىپكەر دميتري پياك 2008 -جىلى وقۋعا كەلگەن. سودان بەرى وڭتۇستىك كورەيادا تۇرادى. بىرنەشە ازىق- تۇلىك دۇكەنىنىڭ يەسى. قازىنى جاساپ شىعاراتىن ءوندىرىس اشۋ يدەياسى وعان 6 جىل بۇرىن كەلگەن. ءبىراق وتكەن جىلى عانا ليتسەنزيا الىپ، سەح اشتى. جىلقى ەتىن چەدجۋ ارالىنان ساتىپ الادى. بۇل - وڭتۇستىك كورەيادا جىلقى ەتىن تۇتىنۋ ءداستۇرى ساقتالعان جالعىز ايماق.

 بۇل اسپازدىق ءداستۇر XII عاسىردا، كورەياعا موڭعول اسكەرى باسىپ كىرگەن كەزدە پايدا بولعان. قازىر جەرگىلىكتى حالىق اراسىندا: «جىلقى ەتىن جۇكتىلىك جانە باس اينالۋ كەزىندە جەۋ پايدالى» دەگەن ماقال- ماتەلدەردى ەستۋگە بولادى.

دميتري پياك، كاسىپكەر:

 - چەدجۋ ارالىندا جىلقى ەتىن جەيدى، ءبىراق ولار ونى شيكىلەي، ساشيمي تۇرىندە تۇتىنادى. ءبىز قازىر وتە جاقسى جەتكىزۋشىمەن جۇمىس ىستەپ جاتىرمىز. ونىڭ جەكە جىلقى فەرماسى بار. ءبىز ونىمەن كەلىسىمگە كەلدىك، جىلقىلاردى ارنايى بورداقىلايدى. سەبەبى مۇندا جىلقىلار اسا سەمىز ەمەس. سوندىقتان ولاردى ءبىر ايداي ۇستاپ، سەمىرتىپ بارىپ الاتىن بولىپ كەلىستىك.

پياكتىڭ كاسىپورنىندا دايىندالعان قازىلار ت م د ەلدەرىنەن كەلگەن كاسىپكەرلەردىڭ دۇكەندەرىندە ساتىلادى. اسىرەسە، قازاقستان مەن وزبەكستاننان كەلگەن ميگرانتتار تاراپىنان سۇرانىس جوعارى. جاڭا جىل مەن ناۋرىز مەرەكەلەرى قارساڭىندا ساتىپ الۋشىلار ءتىپتى كوبەيەدى. پاران قالاسىنداعى دۇكەن قىزمەتكەرى كريستينا يۋن كورەياعا قاپشاعايدان كەلگەن. ول قازى ساتىپ الىپ، ەت اسقاندى ۇناتادى.

 كريستينا يۋن، دۇكەن قىزمەتكەرى:

 - مۇندا ءبارى دايىن كۇيىندە ساتىلادى. مەن جايما، دايىن قازى ساتىپ الامىن. جايمانى قايناتىپ، ۇستىنە پياز قوسامىن. كەيبىرەۋلەر ءسابىز دە قوسادى.

دميتري پياكتىڭ سەحى جىلىنا شامامەن 6 توننا جىلقى ەتى مەن قازى وندىرەدى. بيىل كاسىپكەر بۇل كولەمدى 7 تونناعا دەيىن ۇلعايتۋدى جوسپارلاپ وتىر. بۇل چەدجۋ ارالى تۇرعىندارى اراسىندا دا قازىعا دەگەن قىزىعۋشىلىق جىل سايىن ارتىپ كەلە جاتقانىن كورسەتسە كەرەك. اۆتورلارى: ۆلاديسلاۆ تسوي، ولگا ليان

24.kz 

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى