وتان جالعىز، تۋ جالعىز!
اقىن، مەملەكەتتىك سىيلىقتىڭ لاۋرەاتى، قازاقستاننىڭ ەڭبەك سىڭىرگەن قايراتكەرى، «پاراسات» وردەنىنىڭ يەگەرى نەسىپبەك ايت ۇلىنىڭ «وتان جالعىز، تۋ جالعىز!» جىر جولدارىن نازارلارىڭىزعا ۇسىنامىز.
ءبىزدىڭ وتان ءولىپ، قايتا تىرىلگەن،
ءبىزدىڭ بايراق قۇلاپ، قايتا تىگىلگەن.
وپات بولعان ەرلەر رۋحى ويانار،
وتان دەگەن لەبىز شىقسا تىلىمنەن.
بىزدەر ءۇشىن وتان جالعىز، تۋ جالعىز،
قورعاماساق نەسىن ۇل بوپ تۋعانبىز؟!
كىندىگىمىز تار قاپاستا كەسىلىپ،
ءيت كويلەكتى قاندى جاسپەن جۋعانبىز.
تۋعان جۇرتقا تىرەك بولۋ ەرگە - سىن،
قۇلدىقتى ەندى قۇداي باسقا بەرمەسىن.
اتاڭ ولسە، ءوزىڭ اتا بولارسىڭ،
ەشقاشاندا وتان ولە كورمەسىن!
اكەڭ ولسە، شەشەڭ ولسە جىلارسىڭ،
بالاڭ ولسە، ءبىر جىعىلىپ تۇرارسىڭ.
وتان ولسە، وپىرىلىپ تۇسكەنىڭ،
كۇڭىرەنىپ كورگە بىرگە قۇلارسىڭ.
ءبىزدىڭ وتان ءولىپ، قايتا تىرىلگەن،
ءبىزدىڭ بايراق قۇلاپ، قايتا تىگىلگەن.
وپات بولعان ەرلەر رۋحى ويانار،
وتان دەگەن لەبىز شىقسا تىلىمنەن.
وتانمەنەن اسپانداعى كۇن ەگىز،
ەكەۋىنىڭ اماندىعىن تىلەڭىز.
جاس ازامات، بۇل وتاننىڭ قادىرىن،
وتانسىز بوپ كورگەن بىزدەر بىلەمىز!
كەرەك قىلسا، جولىندا ونىڭ قۇربانبىز،
بارىنە دە بەلدى بەكەم بۋعانبىز.
ءبىر كەۋدەگە ەكى جۇرەك سىيمايدى،
قازاق ءۇشىن وتان جالعىز، تۋ جالعىز!
