وسكەمەندە كومىر جاعىپ وتىرعان جەر ۇيلەر ورتالىقتاندىرىلعان جىلۋعا كوشىرىلمەك

قالادا جەل سوقپاعاندا اينالانى ءتۇتىن باسىپ كەتەتىندىگىنىڭ بىرنەشە سەبەبى بار. سونىڭ ءبىرى - پەش جاعىپ وتىرعان ۇيلەردىڭ زياندى شىعارىندىلارىنىڭ اۋاعا تاراۋى.

بۇنى تاياۋدا قولايسىز مەتەورولوگيالىق جاعداي جاريالانعان كەزدە جەكە سەكتورعا جۇرگىزىلگەن تەكسەرۋ جۇمىستارى دالەلدەدى. ميرنىي كەنتىندە ەكولوگتار كۇكىرت ديوكسيدىنىڭ، كومىرتەگى توتىعى مەن حلوردىڭ رۇقسات ەتىلگەن شەكتەن اسىپ كەتكەنىن انىقتاعان.

ال زاشيتا شاعىن اۋدانىندا كۇكىرتتى سۋتەگى مەن حلوردىڭ اۋاعا تاراعان نورماسى شامادان تىس بولعان.

- قالاداعى ونەركاسىپتىك كاسىپورىنداردىڭ زياندى شىعارىندىلارى جىلىنا شامامەن 55 مىڭ توننانى قۇرايدى. ونىڭ 10 پايىزى - اۆتونومدى قازاندىقتاردان. جەكە تۇرعىن ۇيلەر جىلىتۋ ماۋسىمىندا شامامەن 240 مىڭ توننا كومىر جاعادى. بۇل 14 مىڭ توننا زياندى شىعارىندى، - دەپ حابارلادى ش ق و ەكولوگيا دەپارتامەنتىنەن.

وسى ماسەلەگە قاتىستى وبلىس اكىمى ەرمەك كوشەربايەۆ ورتالىق كوممۋنيكاتسيالار قىزمەتىنىڭ باسپا ءسوز كونفەرەنسياسىندا جاۋاپ بەردى.

- كومىردى جاققاندا اۋاعا تارايتىن شىعارىندى تۇمانمەن جانە باسقا دا شىعارىندىلارمەن ارالاسىپ، اۋانى ودان سايىن لاستايدى. وسكەمەندە پەش جاعىپ وتىرعان 28 مىڭ ءۇي بار. بالكىم، ماسەلە كومىردىڭ ساپاسىندا شىعار. ءبىراق بۇل جەردە تۇرعىنداردىڭ كىناسى جوق. ءبىز جەكە سەكتوردى ورتالىقتاندىرىلعان جىلۋ جۇيەسىنە قوسۋ جاعىن دا ويلاستىرىپ جاتىرمىز»، - دەدى ول.

ەسكە سالساق، وسىعان دەيىن وسكەمەن قالاسىنداعى ەكولوگيا ماسەلەسىن شەشۋ ءۇشىن ارنايى بيۋرو قۇرىلىپ، باقىلاۋدى كۇشەيتۋ كوزدەلىپ وتىرعانى حابارلانعان.

تالعاتجان مۇحامەتبەك ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى