وسكەمەندە حالىق ەمىمەن اۋرۋىنان ايىقپاق بولعان ەر ادامنىڭ كوزى كورمەي قالا جازدادى
وسكەمەن. KAZINFORM - شىعىس قازاقستان وبلىسى گلۋبوكوە اۋدانىندا حالىق ەمىمەن اۋرۋىنان ايىقپاق بولعان ەر ادامنىڭ كوزى كورمەي قالا جازدادى.
گلۋبوكوە اۋدانىندا تۇراتىن 39 جاستاعى ازاماتقا سۋىق ءتيىپ قالعان. كەيىن گايموريتتىڭ بەلگىلەرى بايقالدى. الايدا ول دارىگەرگە قارالعاننىڭ ورنىنا حالىق ەمى ارقىلى ەمدەلمەك بولادى. ءسويتىپ، مۇرنىن قايناتىلعان تۇيمەداق سۋىمەن شايىپ، ميا تامىرىنىڭ تۇنباسىن ىشە باستايدى.
اۋەلدە جاعدايى جاقسارىپ كەلە جاتقانداي كورىنگەنىمەن ءبىر اپتادان سوڭ كوز تۇسى قاتتى اۋىرسىنا باستادى. كەيىن كورۋ قابىلەتى دە ناشارلاي تۇسكەن. تىنىس الۋى قيىنداپ، دەنە قىزۋى كوتەرىلىپ، كوزىندە ىسىك پايدا بولعان ناۋقاس شۇعىل تۇردە وسكەمەن قالاسىنداعى اۋرۋحاناعا جەتكىزىلدى.
- ەندوسكوپيالىق تەكسەرۋ كەزىندە اسقىنۋ تۋدىرعان مۇرىن قۋىستارىنىڭ ساڭىلاۋلارىن بىتەپ تاستاعان ۇلكەن كيستا انىقتالدى. وتادان كەيىن ناۋقاستىڭ جاعدايى تۇراقتاندى. كەلەسى كۇنى كورۋ قابىلەتى قالپىنا كەلە باستادى، - دەپ حابارلادى وبلىستىق اۋرۋحانادان.
وسى رەتتە، دارىگەرلەر حالىق ەمىمەن ءوز- ءوزىن ەمدەۋدىڭ سوڭى اۋرۋدىڭ ودان سايىن اسقىنۋىنا اكەلىپ سوعۋى مۇمكىندىگىن ەسكەرتەدى.
