وسكەمەندە الىپ قىز بالا دۇنيەگە كەلدى
وسكەمەن. KAZINFORM - وسكەمەن قالاسىندا الىپ قىز بالا دۇنيەگە كەلدى.
ش ق و دەنساۋلىق ساقتاۋ باسقارماسى باسپا ءسوز قىزمەتىنىڭ مالىمەتىنە سۇيەنسەك، انا مەن بالا ورتالىعىندا كىندىگى كەسىلگەن شاقالاقتىڭ سالماعى - 6 كەلى 180 گرام، بويى 57 - سانتيمەتر. قىز بالانى اناسى تابيعي جولمەن بوسانعان.
«وسىمەن ءتورتىنشى بالاسىن دۇنيەگە الىپ كەلگەن ايەل 33 جاستا. مۇنداي جاعداي وبلىس قانا ەمەس، رەسپۋبليكا كولەمىندە سيرەك كەزدەسەدى. شاقالاقتىڭ دا، اناسىنىڭ دا جاعدايى جاقسى»، - دەيدى بوساندىرۋ ءبولىمىنىڭ مەڭگەرۋشىسى جادىرا ديۋسۋپوۆا.
بۇل بيىل ءوڭىر كولەمىندە تۋعان تۇڭعىش الىپ بالا. ال وسكەمەندەگى انا مەن بالا ورتالىعىندا وسى جىلدىڭ 3 ايىندا دۇنيەگە كەلگەن ەڭ كىشكەنتاي بالانىڭ سالماعى - 730 گرام. قازىر ول رەانيماتسيا جانە ينتەنسيۆتى تەراپيا ورتالىعىنا جاتقىزىلعان.
