وسكەمەندە 20 جىل بۇرىنعى قىلمىس اشىلدى
وسكەمەن. KAZINFORM - وسكەمەن قالاسىنىڭ پوليتسەيلەرى وسىدان 20 جىل بۇرىنعى ادام ءولتىرۋ فاكتىسى بويىنشا كۇدىكتىنى ۇستادى.
ش ق و پوليتسيا دەپارتامەنتى باسپا ءسوز قىزمەتىنىڭ مالىمەتىنە سۇيەنسەك، 2004 -جىلدىڭ 22 -قاڭتارىندا وسكەمەندەگى ۇيلەردىڭ بىرىنەن زورلىق بەلگىلەرى بار ەر ادامنىڭ ءمايىتى تابىلعان.
اتالعان فاكتى بويىنشا «كىسى ءولتىرۋ» بابىمەن قىلمىستىق ءىس قوزعالعان. الايدا سول كەزدە قىلمىسكەر ءىزىن سۋىتىپ ۇلگەرىپ، وعان قوسا ايعاقتاردى جويۋ ءۇشىن ءۇيدى ورتەپ جىبەرگەن. بۇل تەرگەۋ بارىسىن قيىنداتا ءتۇستى.
- قانشا جىل وتسە دە، پوليتسيا قىزمەتكەرلەرى ءىستى توقتاتپادى. جەدەل ۋاكىلدەر ماتەريالداردى مۇقيات زەرتتەپ، جينالعان دەرەكتەردى تالداپ، قىلمىستىڭ تولىق كورىنىسىن رەت-رەتىمەن قالپىنا كەلتىردى. 2025 -جىلدىڭ اقپان ايىندا قىلمىستىق ءىس قايتا جالعاسىپ، جەدەل تەرگەۋ توبى كەشەندى ىزدەستىرۋ شارالارىن جۇرگىزدى. ناتيجەسىندە كۇدىكتىنىڭ ىزىنە ءتۇستى، - دەلىنگەن اقپاراتتا.
18-اقپاندا سوت شەشىمىمەن كۇدىكتى قاماۋعا الىندى. قازىرگى ۋاقىتتا قىلمىستىڭ بارلىق ءمان-جايىن انىقتاۋعا باعىتتالعان تەرگەۋ امالدارى جالعاسىپ جاتىر.
ەسكە سالساق، بۇعان دەيىن سەمەيدە 30 جاستاعى ايەلدەن 18 ميلليون تەڭگەنىڭ ەسىرتكىسى تاركىلەنگەنى حابارلانعان.
اۆتور
تالعاتجان مۇحامەتبەك ۇلى
