ورتالىق ازيانىڭ تۋريستىك برەندى جوق، سونى جاسايتىن ۋاقىت كەلدى - ساراپشى
تۋريزم سالاسىنىڭ ساراپشىلارى الماتىدا ورتالىق ازياداعى تۋريزمدى حالىقارالىق ترەندتەرگە ساي دامىتۋ ماسەلەسىن تالقىلادى، دەپ حابارلايدى Kazinform.
«وكىنىشكە قاراي، ورتالىق ازياداعى تۋريزمنىڭ الەمدە وزىندىك ويىپ الار ورنى جوق. بىزگە تۋريستەر ەۋروپاعا بارعانداي كەلمەيدى. نەگە؟ سەبەبى، تۋريستەردى ءبىر عانا ەل قىزىقتىرمايدى. ولار بىردەن بىرنەشە مەملەكەتتى ارالاپ كورگىسى كەلەدى. سوندىقتان، ورتالىق ازيادا ورنالاسقان بەس مەملەكەتتى (قازاقستان، وزبەكستان، قىرعىزستان، تاجىكستان جانە تۇركىمەنستان) تۋريزم سالاسى بويىنشا ايماقتاندىرۋ قاجەت. بۇل - بۇگىندە كەزەك كۇتتىرمەيتىن ماسەلە»، - دەيدى تۋريزم سالاسىنىڭ ساراپشىسى ماقسات چاكي.
سپيكەردىڭ سوزىنشە، بەس مەملەكەتتى بىرىكتىرەتىن ءبىر ورتالىق قۇرىلسا، تۋريزم جىلدام داميدى.
«ورتالىق ازياداعى تۋريزم ورتالىعىن الماتىدا قۇرۋ كەرەك دەپ ويلايمىن. وعان ءىرى مەگاپوليستىڭ الەۋەتى جوعارى. ءبىز بىرىگەتىن بولساق، الەمدىك دەڭگەيگە كوتەرىلە الامىز. تۋريزم — كوپتەگەن ەلدە ماڭىزدى سالا. ورتالىق ازيادا ول ءالى دە كەنجەلەپ تۇر. ەگەر قازىرگىدەي ءار مەملەكەت ءتۋريزمدى وزىنشە دامىتامىن دەسە، قاتەلەسەدى. شەتەلدىك تۋريستەردىڭ نازارىن وزىمىزگە اۋدارۋ ءۇشىن بىرىگىپ كۇش جۇمساۋىمىز كەرەك»، - دەيدى ساراپشى.
سونىمەن قاتار، ول ۆيزالىق رەجيمدى جەڭىلدەتۋ ماسەلەسىنە ەرەكشە نازار اۋداردى.
«بىزگە دە شەنگەن ۆيزاسىن ەنگىزۋ قاجەت. بۇل، البەتتە، ۇكىمەتتە قارالاتىن دۇنيە. مىسالى، ونى Stan، جىبەك جولى ۆيزاسى دەپ اتاۋعا بولادى. قازاقستانعا كەلگەن شەتەلدىك تۋريست ەش كەدەرگىسىز قىرعىزستانعا، ودان ءارى وزبەكستانعا ءوتىپ كەتۋى كەرەك. مىنە، سول كەزدە تۋريزمنەن مول تابىس تۇسەدى»، - دەيدى سپيكەر.
تۋريزمنىڭ ستراتەگيالىق ساراپشىسى برەند جايىندا دا ءسوز قوزعادى.
«ءار ەلدىڭ وزىنە ءتان برەندى بار. سول سياقتى ورتالىق ازيانىڭ دا برەندى بولۋى كەرەك. ءبىز الماتىنىڭ برەندىن قالىپتاستىرماقپىز. ءبىراق، ونىڭ جەمىس بولمايتىنى انىق. قازىر ماماندار ۇسىنىس ايتىپ جاتىر، جان-جاقتى زەردەلەنۋ ۇستىندە. ۋاقىتى كەلگەندە ايتارمىز»، - دەدى قىرعىزستاندىق ساراپشى.
