ورتالىق ازيانىڭ ءبىرىڭعاي ۆيزاسى ەنگىزىلۋى مۇمكىن

ەلدەر اراسىندا ءبىرىڭعاي ۆيزا ەنگىزۋ جوسپارى بار. بۇل جونىندە قىرعىزستاندا وتكەن «Kazakhstan: Born Bold» جوباسىنىڭ تۇساۋكەسەرى كەزىندە ايتىلدى. ورتالىق ازياعا تۋريستەردى كوپتەپ تارتۋ جولدارىنىڭ ءبىرى ۆيزالىق رەجيمدى جەڭىلدەتۋ شارالارى بولا الادى.

قازىر وسى ماقساتتا ورتالىق ازيانىڭ ءبىرىڭعاي ۆيزاسىن ەنگىزۋ ماسەلەسى مەملەكەتارالىق دەڭگەيدە تالقىلانىپ جاتىر. بۇل وسىنداي رۇقسات العان شەتەلدىككە ايماقتاعى بارلىق ەلگە ەركىن ساياحاتتاۋعا مۇمكىندىك بەرەر ەدى. مىسالى، قازاقستانعا كەلگەن تۋريست ءبىر ۆيزامەن كورشى قىرعىزستانعا دا ەش قيىندىقسىز بارا الادى.

سەرگەي گلۋحوۆەروۆ، تۋريستىك فيرمانىڭ ديرەكتورى:

- بىزگە تۋريستەردى تارتۋ ءۇشىن وسى سالاداعى الەۋەتىمىزدى بىرىگىپ جارنامالاپ ارەكەت ەتۋ كەرەك. مىسالى، قىرعىزستاننىڭ ىشىندە ءتۇرلى تۋرلار ۇيىمداستىرساق، تۋريسكە ءبىر ۆيزامەن كورشىلەس قازاقستان، وزبەكستان، تاجىكستان، تۇرىكمەنستانعا دا ساياحاتتاپ بارۋعا بولاتىنىن كورسەتەمىز. جاقسى باعىتتار ۇسىنامىز. ءسويتىپ، ايماققا تۋريستەردى كوپتەپ تارتامىز.

قازاقستاندا تۋريزمدى دامىتۋ قىرعىزستانعا دا وتە ءتيىمدى. سەبەبى تۋروپەراتورلار تۋريستەرگە ءبىر ەلگە عانا ەمەس، بۇكىل ايماققا ساياحاتتاۋدى ۇسىنا وتىرىپ، قىزىعۋشىلىعىن تۋدىرادى. قوناقتار دا ءبىر ساپاردا بىرنەشە ەلدى ارالاپ دەمالا الادى. بۇل كورشى ەلدەر اراسىندا ينفراقۇرىلىمدى دامىتۋعا سەپتىگىن تيگىزەدى. مىسالى، الماتىدان ىستىقكولگە دەيىن جول سالۋعا نەگىز بولادى.

كىيال كەنجەماتوۆا، قىرعىزستان ەكونوميكا مينيسترلىگى تۋريزم دەپارتامەنتى ديرەكتورىنىڭ ورىنباسارى:

- مۇنداي جولدى سالۋ ءۇشىن جوبا اياسىندا ءبىز ونى ءالى جان-جاقتى تالقىلايمىز. بۇل ءۇشىن ماسەلەنى تەرەڭىرەك زەرتتەيتىن جۇمىسشى توپ بار جانە جوبانى ازيا دامۋ بانكىنىڭ قولداۋىمەن جۇزەگە اسىرۋعا بولادى.

رەسمي دەرەك بويىنشا، بىلتىر قىرعىزستانعا 17 ميلليونعا جۋىق تۋريست بارعان. ونىڭ 2,5 ميلليونعا جۋىعى - قازاقستان ازاماتى. بۇل 2 جىل بۇرىنعى كورسەتكىشپەن سالىستىرعاندا 120 مىڭ ادامعا كوپ. دەمالۋعا بارعاندار تەك كۋرورتتىق باعىتتى عانا ەمەس ەكسترەمالدى جانە ەتنوگرافيالىق دەمالىستى دا كوپتەپ تاڭدايتىن بولعان.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى