ورتالىق ازيانىڭ الەمدىك ساياساتتاعى سالماعى ارتا ءتۇستى - وزبەكستاندىق ساراپشى

جوسپارلانىپ وتىرعان جوعارى دەڭگەيدەگى كەلىسسوزدەردىڭ ماڭىزى مەن تاراپتاردىڭ كەلەشەك ىنتىماقتاستىعىنا قاتىستى ورتالىق ازيا حالىقارالىق ينستيتۋتى ديرەكتورىنىڭ كەڭەسشىسى، وزبەكستاننىڭ بۇرىنعى سىرتقى ىستەر ءمينيسترى سايدمۋحتور سايدكاسىموۆ پىكىر ءبىلدىردى.

ونىڭ ايتۋىنشا، قازىرگى ۋاقىتتا ءوڭىر مەملەكەتتەرىنىڭ الەمدىك ساياساتتاعى ءرولى اۋقىمدى. بۇعان «ورتالىق ازيا+» فورماتىنداعى كەزدەسۋلەردىڭ ءجيى ۇيىمداستىرىلۋى ايعاق. ياعني، و ا ەلدەرىمەن ىنتىماقتاستىقتى تەرەڭدەتۋگە نيەتتى ەلدەردىڭ قاتارى ارتىپ كەلەدى.

- بۇگىندە مەملەكەت باسشىلارىنىڭ بىرلەسكەن جۇمىسى مەن ىنتىماقتاستىعىنىڭ ناتيجەسىندە ورتالىق ازيانىڭ الەمدىك ارەناداعى ساياي-ەكونوميكالىق سالماعى ارتا ءتۇستى. ءبىزدىڭ پىكىرىمىزبەن الپاۋىت دەرجاۆالار ساناساتىن دارەجەگە جەتتىك، - دەدى سايدمۋحتور سايدكاسىموۆ Kazinform ءتىلشىسىنىڭ ساۋالىنا جاۋاپ بەرە وتىرىپ.

سپيكەردىڭ پايىمىنشا، ەۋروايماق ەلدەرى ورتالىق ازيا مەملەكەتتەرىمەن اراداعى جان-جاقتى قارىم-قاتىناستى جاڭا دەڭگەيگە شىعارۋعا كۇش سالىپ كەلەدى. ونىڭ ىشىندە ستراتەگيالىق شيكىزات، سيفرلىق ترانسفورماتسيا مەن ەنەرگەتيكا سالالارىنداعى بايلانىستاردى نىعايتۋ سامميتكە قاتىسۋشى تاراپتاردىڭ ەلدىك مۇددەسىنە ساي كەلەدى.

- ايماق مەملەكەتتەرىنىڭ سىرتقى ساياساتى بارلىق سالاداعى بايلانىستاردى ىلگەرىلەتۋگە باعىتتالىپ وتىر. وسى ورايدا، «ورتالىق ازيا -ەۋرووداق» ءسامميتى ىنتىماقتاستىقتىڭ بارلىق باعىتىن قامتيدى. اسىرەسە، الەۋمەتتىك-ەكونوميكالىق جانە ساياسي، مادەني-گۋمانيتارلىق بايلانىستاردى نىعايتۋ ءۇشىن قاجەت، - دەپ توقتالدى س. سايدكاسىموۆ.

ورتالىق ازيا ەلدەرىنىڭ سىرتقى ىستەر مينيسترلەرى سامميتكە دايىندىق بارىسىن 4-ناۋرىزدا اشحابادتا وتەتىن كەزدەسۋ اياسىندا تالقىلايدى.

ايتا كەتەيىك، ەۋرووداق ورتالىق ازيانىڭ نەگىزگى سىرتقى ساۋدا سەرىكتەستەرىنىڭ ۇشتىگىنە كىرەدى. سونىمەن قاتار، ءوڭىر ەلدەرىنە باعىتتالعان بارلىق ينۆەستيتسيانىڭ %40 دان استامى ە و- عا مۇشە مەملەكەتتەردىڭ ۇلەسىندە.

ەسكە سالساق، «ورتالىق ازيا - ەۋرووداق» فورماتىنداعى العاشقى سامميت بىلتىر كوكتەمدە ءوتۋى ءتيىس بولعان. دەگەنمەن ول ەۋرووداقتىڭ باسشىلىق قۇرامىنداعى وزگەرىستەرگە بايلانىستى كەيىنگە قالدىرىلدى.

بۇعان دەيىن حابارلاعانىمىزداي، قىتاي ورتالىق ازيا ەلدەرىمەن بىرلەسىپ ونەركاسىپتىك كووپەراتسيانى دامىتۋعا نيەتتى.

سونىمەن قاتار، بىلتىر ق ر پرەمەر-ءمينيسترى ولجاس بەكتەنوۆ ورتالىق ازيا ەلدەرى مەن حالىقارالىق قارجى ۇيىمدارىن كۇش بىرىكتىرۋگە شاقىرعان بولاتىن.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى