«ورتالىق ازيا - ەۋروپا وداعى» سامميتى باستالدى
سامارقاند. KAZINFORM - وزبەكستاننىڭ سامارقاند قالاسىندا «ورتالىق ازيا - ەۋروپا وداعى» فورماتىنداعى العاشقى سامميت باستالدى، دەپ حابارلايدى Kazinform اگەنتتىگىنىڭ مەنشىكتى ءتىلشىسى ءاليحان اسقار.
سامميتكە وزبەكستان پرەزيدەنتى شاۆكات ميرزيەيەۆ ءتوراعالىق ەتىپ وتىر. تيىسىنشە، العاش بولىپ ءسوز ول اتالعان ءىس-شاراعا قاتىسۋعا نيەت بىلدىرگەنى ءۇشىن ەۋروپالىق كەڭەس پرەزيدەنتى انتونيۋ كوشتا، ەۋروپالىق كوميسسيا پرەزيدەنتى ۋرسۋلا فون دەر ليايەن جانە ورتالىق ازيا مەملەكەتتەرىنىڭ كوشباسشىلارىنا العىس ءبىلدىردى.
بۇعان دەيىن مەملەكەت باسشىسى قاسىم-جومارت توقايەۆ «ورتالىق ازيا - ەۋروپا وداعى» سامميتىنە قاتىسۋ ءۇشىن «كونگرەسس- ورتالىققا» كەلگەنىن جازىپ ەدىك.
بۇگىنگى كەزدەسۋدە تاراپتار كولىك-لوگيستيكالىق جوبالاردى بىرلەسىپ قولعا الۋ، ستراتەگيالىق شيكىزات باعىتىنداعى سەرىكتەستىك، ەكولوگيالىق تازا جانە ءتيىمدى ەنەرگيا ءوندىرۋ كوزدەرىن ەنگىزۋ مۇمكىندىكتەرىن تالقىلايدى.
بۇعان دەيىن ءىس-شاراعا قاتىستى پىكىر بىلدىرگەن ەۋروپالىق كەڭەس پرەزيدەنتى انتونيۋ كوشتا «ورتالىق ازيا - ەۋروپا وداعى» سامميتى ءوڭىر ەلدەرى مەن ەۋروايماق مەملەكەتتەرىنىڭ ورنىقتى دامۋىنا تىرەك بولاتىن ىنتىماقتاستىق باعىتىن ايقىندايتىن الاڭ بولاتىنىن مالىمدەدى.
ەسكە سالايىق، كەشە پرەزيدەنت قاسىم-جومارت توقايەۆ وزبەكستانعا جۇمىس ساپارىمەن كەلدى. ونىڭ بارىسىندا مەملەكەت باسشىسى ەۋروپالىق كەڭەس پرەزيدەنتى انتونيۋ كوشتا، ەۋروپالىق كوميسسيا پرەزيدەنتى ۋرسۋلا فون دەر ليايەن، ەۋروپالىق قايتا قۇرۋ جانە دامۋ بانكىنىڭ پرەزيدەنتى وديل رەنو-باسسومەن ەكىجاقتى كەزدەسۋلەر وتكىزدى.
