ورتالىق ازيا ەلدەرى توتەنشە جاعدايلاردى الدىن الا حابارلايتىن ورتاق پلاتفورما قۇرماق
تاشكەنت. KAZINFORM - وزبەكستان استاناسى تاشكەنت قالاسىندا ورتالىق ازياداعى (و ا) كليماتتىڭ وزگەرۋىن باسقارۋ جونىندەگى سەمينار ءوتتى، دەپ حابارلايدى Kazinform اگەنتتىگىنىڭ تاشكەنتتەگى مەنشىكتى ءتىلشىسى.
جيىنعا ورتالىق ازيا ەلدەرىنىڭ جاۋاپتى مينيسترلىك وكىلدەرى، ساراپشىلار مەن حالىقارالىق ەكولوگتار قاتىستى. ولار ترانسشەكارالىق وزەندەردەگى سۋ ساپاسى، توتەنشە جاعدايلاردىڭ الدىن الۋعا باعىتتالعان مونيتورينگىلەۋ ورتالىقتارىنىڭ جۇمىسىن جەتىلدىرۋ باستامالارىن تالقىلادى.
قازاقستاندىق دەلەگاتسيانىڭ اتىنان كەلگەن و ا ەلدەرى بويىنشا توتەنشە جاعداي مەن اپات تاۋەكەلدەرىن تومەندەتۋ ورتالىعىنىڭ ديرەكتورى سەرىك اۋباكىروۆ 5 مەملەكەتتىڭ حابارلاندىرۋ جۇيەسىن ينتەگراتسيالاۋ باعىتىندا جۇمىستار قولعا الىناتىنىن ايتتى.
«قازىر ءبىز ءتۇرلى توتەنشە جاعدايلاردىڭ الدىن الۋ ءۇشىن حابارلاندىرۋ جۇيەلەرىن ينتەگراتسيالاۋعا كوڭىل بولۋدەمىز. ورتالىق ازيا مەملەكەتتەرى ءبىر بەلدەۋدە ورنالاسقان جانە تايفۋن مەن جانارتاۋ اتقىلاۋ سياقتى اپاتتاردان باسقا كليماتتىق وزگەرىستەردىڭ بارلىعى ورتاق»، - دەدى س. اۋباكىروۆ.
ونىڭ اتاپ وتۋىنشە، بۇگىندە ترانسشەكارالىق توتەنشە جاعدايلار دا از ەمەس. ياعني، ەپيتسەنترى باسقا ەلدە باستالىپ، سالدارى كورشىلەس مەملەكەتتەردە سەزىلۋى مۇمكىن جەر سىلكىنىسى سياقتى قاۋىپتەر بار.
«بۇل رەتتە بىزگە اقپاراتتىق جۇيەلەردى اۆتوماتتاندىرۋ ماڭىزدى. ادامي فاكتوردىڭ قاتىسۋىنسىز موبيلدى قوسىمشالار ارقىلى جەدەل حاباردار ەتۋ شارلارىن پىسىقتاپ جاتىرمىز. ءار ەلدىڭ ءوزىنىڭ ۇلتتىق باقىلاۋ جۇيەلەرى بار. ەندى ولاردى بىرىكتىرىپ، سول ارقىلى توتەنشە جاعداي تۋرالى الدىن الا ءوزارا اقپارات الماسۋ ءۇشىن ورتاق پلاتفورما ازىرلەيمىز. ءبىزدىڭ ۇيىم ورتالىق ازيا ەلدەرىنىڭ توتەنشە جاعدايلار مينيسترلىكتەرىنە ۇسىنىس دايىنداۋ وكىلەتتىگنە يە»، - دەپ توقتالدى س. اۋباكىروۆ.
و ا ەلدەرىنىڭ ۇلتتىق مونيتورينگىلەۋ جۇيەلەرىن بىرىكتىرەتىن پلاتفورمانىڭ ناقتى قاي جىلى ىسكە قوسىلاتىنى بەلگىسىز. ويتكەنى، ول مەملەكەتتەردىڭ جىلدىق بيۋجەتىن جوسپارلاۋىنا بايلانىستى.
