وربان ۋكراينا بويىنشا ە و-نىڭ 27 ەلى قابىلداماق بولعان دەكلاراتسيانى بۇعاتتادى

بۇل تۋرالى وربان 20-ناۋرىز، بەيسەنبى كۇنى Х الەۋمەتتىك جەلىسىندە جازبا قالدىردى، دەپ حابارلايدى Dw.com.

- ۆەتو! جەتەدى! ءبىز ۋكراينانىڭ ە و- عا مۇشەلىگى تۋرالى ماجار حالقىنان سۇرايمىز. سول ۋاقىتقا دەيىن بۇل ماسەلەگە قاتىستى قانداي دا ءبىر ورتاق ۇستانىمدى قولداي المايمىز، -دەپ جازدى ۆەنگريا پرەمەر-ءمينيسترى.

ەۋرووداق ەلدەرىنىڭ 26 مەملەكەتىنىڭ باسشىلارى جاريالاعان دەكلاراتسيادا كيەۆكە قولداۋ ءبىلدىرۋ ايتىلدى، دەپ حابارلايدى AFP اگەنتتىگى. قۇجاتتا ۋكرايناعا شۇعىل اسكەري جانە قورعانىس قاجەتتىلىكتەرىن قاناعاتتاندىرۋ ءۇشىن كۇش-جىگەردى جەدەلدەتۋ قاجەتتىگى اتاپ وتىلگەن.

سونداي-اق، ە و-نىڭ سىرتقى ىستەر جانە قاۋىپسىزدىك ساياساتى جونىندەگى جوعارعى وكىلى كايا كاللاستىڭ ۋكرايناعا بيىل 5 ميلليارد ەۋرو كولەمىندە ارتيللەريالىق وق-دارىلەر ءبولۋ باستاماسى تۋرالى ايتىلدى. دەكلاراتسيادا ەۋرووداقتىڭ ۋكراينانىڭ ە و- عا مۇشەلىككە ءوتۋ جولىنداعى رەفورمالارىن قولداۋدى جالعاستىراتىنى ەرەكشە اتاپ كورسەتىلدى.

ۋكرايناعا اسكەري كومەك پاكەتى

بۇعان دەيىن ۆيكتور وربان ۋكرايناعا قاتىستى ە و شەشىمدەرىن بىرنەشە رەت بۇعاتتاعان نەمەسە كەشىكتىرگەن بولاتىن.

4-ناۋرىزدا Politico باسىلىمى ۆەنگريا بيلىگىنىڭ ۋكرايناعا 20 ميلليارد ەۋرو كولەمىندە اسكەري كومەك كورسەتۋ تۋرالى ەۋرووداق شەشىمىن قابىلداۋعا كەدەرگى كەلتىرگەنىن حابارلادى.

بۇل كومەك پاكەتى تۋرالى العاشقى مالىمەت 21 -اقپاندا Politico-دا جاريالانىپ، ە و ديپلوماتتارى ۆەنگريانىڭ قارسىلىعىنا بايلانىستى بۇل قاراجات بارلىق وداق اتىنان ەمەس، جەكە مەملەكەتتەر ارقىلى ءبولىنۋى مۇمكىن ەكەنىن ايتقان ەدى.

بۇعان دەيىن ۆيكتور وربان ە و باسشىلىعىنا ءبىرقاتار تالاپتار قويعان بولاتىن.

اۆتور

نازىم بولەسوۆا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى