ورازا ۇستاعان: قايتىس بولعان اقتاۋلىق سپورتشىنىڭ باپكەرى وقيعا تۋرالى ايتتى

اقتاۋلىق باپكەر ەلۆين اگايەۆ جارىس كەزىندە باقيلىق بولعان شاكىرتىن ءۇش ايدان بەرى جاتتىقتىرعانىن جەتكىزدى.

«اقتاۋداعى «باتىر» سپورت كەشەنىندە وبلىس چەمپيوناتى ءوتىپ، تراگەديالىق جاعداي ورىن الدى. بۇنداي قاسىرەتتى ەشكىمنىڭ باسىنا تىلەمەيمىن. مارقۇم سپورتشى قول استىمدا 3 اي بويى جاتتىققان ەدى. وسىعان دەيىن ول بىردە-ءبىر رەت دەنساۋلىعىنا قاتىستى شاعىم ايتقان جوق. جاتتىعۋعا كەلمەي قالعان كەزدەرىندە س م س جازىپ، ەسكەرتىپ ءجۇردى»، - دەيدى باپكەر.

باپكەر قانات احۋنوۆتىڭ بۇعان دەيىن جاس وسپىرىمدەر اراسىندا ايتۋلى جەتىستىكتەرگە قول جەتكىزگەنىن العا تارتتى.

«ول كيكبوكستان الەم جانە ازيا چەمپيونى اتانعان. كەيىن ءبىر جىلداي ۇزىلىستەن كەيىن ماعان جاتتىعۋعا كەلدى. جارىسقا 2-3 اپتا قالعاندا بىزگە قاتىسۋ تۋرالى ۇسىنىس تۇسەدى. شاكىرتتەرىمنىڭ اراسىنان ۇزدىكتەرىن تاڭداپ اپارامىن. قايتىس بولعان قانات اۋىر سالماقتا ونەر كورسەتتى. وتە تاجىريبەلى ەدى. الەم چەمپيوناتىنا قاتىسقاندا ول بۇدان جەڭىل سالماقتا ونەر كورسەتكەن. جارىسقا قاتىساتىنداردىڭ ءتىزىمىن جاساعاندا ول دا بۇل چەمپيوناتقا قاتىسقىسى كەلەتىنىن ايتتى. ونىڭ اۋىر سالماقتا سىنعا تۇسە الاتىنى انىق بايقالاتىن. سالماعى دا جەتكىلىكتى، قول-اياعى كۇشتى ەدى. ءبىرىنشى جەكپە-جەكتە ۋاقىتىنان بۇرىن جەڭىسكە جەتتى. 20 سەكۋندتقا جەتپەي قارسىلاسىنان باسىم ءتۇستى. ەكىنشى جەكپە-جەكپە شىعىپ، ءوز مۇمكىندىگىن كورسەتىپ جاتتى. الايدا كەزدەسۋدىڭ ورتاسىنا جەتكەندە قاراسام بۇرىنعىداي بولماي تۇردى. ۇزىلىستە باپكەر رەتىندە ءارى سەكۋندانت بولىپ تۇرىپ اۋزىنان كاپاسىن الدىم. «ءوزىڭدى قالاي سەزىنىپ تۇرسىڭ؟» دەگەنىمدە: «ءبارى جاقسى، جالعاستىرامىن» دەدى. تەرەڭ تىنىس الىپ كوردى. سۋ بۇركىدىم. وسىلايشا ول قايتا ايقاسقا شىقتى. شامامەن 30 سەكۋند وتكەندە ءبارى باسقاشا بولدى»، - دەدى باپكەرى.

ەلۆين اگايەۆ وقيعا بەينەجازبادا كورىنىپ تۇرعانىن اتاپ ءوتتى.

«ول سوققى تيگەنشە قۇلاپ بارا جاتتى. نەگىزى قانات ول سوققىدان قۇلامايتىن ەدى. سوندىقتان، ونى سوققىدان قۇلادى دەۋگە كەلمەيدى. سونىمەن بىرگە، بۇعان دەيىن نەلىكتەن ءبىر جىلداي سپورتتان ءۇزىلىس جاساعان سەبەبىن ايتقان ەمەس. ول جانىپ تۇرعان جاس بالا بولدى. سپورتپەن ءومىر سۇرەتىن ءارى وتە تاجىريبەلى ەدى»، - دەدى ە. اگايەۆ.

جەكپە-جەككە شىققان قوس سپورتشىنىڭ سالماعى سايكەس كەلگەن. سونداي-اق، دەنساۋلىعىنا قاتىستى ءتيىستى ورىنداردىڭ بەرگەن انىقتاماسىندا ەشقانداي كىنارات بارى جازىلماعان.

«جەدەل جاردەم قىزمەتى 10-15 مينۋتتا كەلدى. سوسىن جانساقتاۋ بولىمىنە اكەتتى. بارلىق مۇمكىندىكتى جاسادى دەدى. الايدا ول ءبىزدى تاستاپ كەتە باردى. كەشە وقيعادان كەيىن ءبىزدى جينادى. وقيعا تۋرالى بولعان جايدى ايتتىق. بۇگىن اتا-اناسىنا بارىپ كوڭىل ايتامىن»، - دەدى باپكەر.

وقىس جاعداي كەزىندە قانات احۋنوۆ ايقاس الاڭىندا قۇلاعان ساتتە تورەشى ونىڭ كاپاسى مەن شلەمىن شەشكەن. سول ساتتە دارىگەر دە كومەككە كەلىپ، ارتىنشا باپكەرى دە كىلەمگە جۇگىرىپ جەتىپتى.

«ءبارى قاناتتى نوكاۋتقا ءتۇستى دەپ ويلادى. قارسىلاسى دا قۋانىپ جاتتى. ال مەن ءتىلىن جۇتىپ قويدى ما دەپ ويلاپ، اۋزىنا قارادىم. ءبارى ورنىندا بولدى. وسىدان كەيىن چەمپيونات توقتاتىلدى. ال دارىگەرلەر ءولىمنىڭ سەبەبىن جۇرەكتىڭ توقتاۋىمەن ءتۇسىندىردى. ول جارىس الدىندا مۇلدەم تولقىعان جوق. ءوزىن وتە جاقسى سەزىندى. وسى قارسىلاسىن جاقسى تانيتىنىن ايتىپ، ارالاسىپ تۇرامىز دەپ ەدى»، - دەيدى ەلۆين اگايەۆ.

سونىمەن قوسا، جەكە باپكەرى 17 جاستاعى قاناتتى ءۇش اي ىشىندە اپارعان العاشقى جارىس بولعانىن ايتىپ وتىر. سونداي-اق، شاكىرتىنىڭ باپكەرىنە ايتپاستان ورازا ۇستاپ جۇرگەنىن اتاپ، «ەگەر ونىسىن بىلگەندە جارىسقا مۇلدەم اپارماس ەدىم» دەگەن وكىنىشىن دە جاسىرمادى.

بۇعان دەيىن ماڭعىستاۋ وبلىستىق Nomad MMA فەدەراتسياسىنىڭ وكىلدەرى سپورتشىنىڭ ولىمىنە قاتىستى مالىمدەمە جاساعان بولاتىن.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى