وقۋشىلاردان ويۋلى جاكەتتەرىن شەشۋدى تالاپ ەتكەن مۇعالىمنىڭ ءىسى پوليتسياعا ءوتتى
تۇركىستان. KAZINFORM - ماقتاارال اۋدانىندا بولعان جاعدايدى ق ر وقۋ-اعارتۋ مينيسترلىگى مەن جەرگىلىكتى اتقارۋشى ورگاندار دا ءوز باقىلاۋىنا الدى.
تۇركىستان وبلىسى پوليتسيا دەپارتامەنتىنىڭ باسپا ءسوز قىزمەتى ۇسىنعان اقپاراتقا سۇيەنسەك، قازىرگى تاڭدا اتالعان فاكت بويىنشا ماقتاارال اۋدانىنىڭ پوليتسيا بولىمىندە ءىس تىركەلگەن. ءتارتىپ ساقشىلارى وقيعانىڭ بارلىق ءمان-جايىن انىقتاپ جاتىر. ناتيجەسى بويىنشا زاڭدى شەشىم قابىلداناتىن بولادى.
ايتا كەتەيىك، كەشە تۇركىستان وبلىسىندا مۇعالىم وقۋشىلاردان ويۋلى جاكەتتەرىن شەشۋدى تالاپ ەتكەنىن جازعان بولاتىنبىز. الەۋمەتتىك جەلىدە ۇلتتىق كيىممەن ساباققا بارعان وقۋشىلارعا ۇرسىپ، ويۋلى جاكەتىن كۇشتەپ شەشتىرگەن ۇستازدىڭ ۆيدەوسى تارادى.
«مەن ساباعىما ءوزىم جاۋاپ بەرەمىن، اق كويلەكپەن وتىرادى» - دەگەن مۇعالىم مەكتەپ ديرەكتورىنىڭ تاربيە ءىسى جونىندەگى ورىنباسارىنا دا داۋىس كوتەرەدى. ۆيدەوداعى كادردا جىلاپ تۇرعان وقۋشى قىز مۇعالىمنىڭ ساباق ۇستىندە پسيحولوگيالىق قىسىم كورسەتىپ، نەگىزسىز جاڭا داپتەر ارناتقانىن ايتادى.
اتالعان جاعداي 14-ناۋرىز كۇنى ماقتاارال اۋدانىندا بولعان. تۇركىستان وبلىستىق ءبىلىم باسقارماسى ۇسىنعان اقپاراتقا سۇيەنسەك، بۇگىندە بۇل ماسەلەنى ق ر وقۋ-اعارتۋ مينيسترلىگى مەن جەرگىلىكتى اتقارۋشى ورگاندار ءوز باقىلاۋىنا العان.
اۆتور
قايرات زاينيشيەۆ
