ومىرىمدە ءمان قالمادى. ايەلىن ءولتىرىپ، سوتتالعاندار وكىنىشىن ايتتى

وتباسىنداعى تۇرمىستىق زورلىق-زومبىلىق - قوعامىمىزدىڭ ەڭ اۋىر ءارى كۇردەلى ماسەلەلەرىنىڭ ءبىرى. ونىڭ سالدارى تەك ءبىر وتباسىنىڭ ەمەس، تۇتاس ۇرپاقتىڭ تاعدىرىنا ىقپال ەتەدى. وكىنىشكە قاراي، زورلىق-زومبىلىق دەرەكتەرى ايەلدەرگە قاتىستى ءجيى تىركەلەدى. اتىراۋ وبلىسىندا جىل باسىنان بەرى پوليتسياعا 3667 تۇرمىستىق زورلىق-زومبىلىق تۋرالى حابارلاما تۇسكەن. ونىڭ ىشىندە 400 دەن اسا قايتالانعان قۇقىقبۇزۋشىلىق انىقتالىپ، جانجال شىعارۋشىلارعا 3143 قورعاۋ نۇسقاماسى بەرىلگەن.

بۇل ستاتيستيكانىڭ ارتىندا ناقتى تاعدىرلار، جان-جاراسى، قايعى-قاسىرەت جانە ماڭگىلىك وكىنىش جاتىر. اتىراۋ وبلىسىنىڭ پوليتسيا دەپارتامەنتىنىڭ قىزمەتكەرلەرى وسىنداي زورلىق-زومبىلىق ارەكەتى ءۇشىن سوتتالعان ادامدارمەن سويلەسىپ، ولاردىڭ وكىنىشتەرىن تىڭدادى. ەكى وقيعا دا وزگەلەرگە ساباق بولار اۋىر مىسال.

«ايەلىمدى جاقسى كوردىم. ءبىراق سول كۇنى ىشىمدىك ءىشىپ كەلدىم. ەكەۋمىز قاتتى ۇرىسىپ، اشۋعا بەرىلىپ، وعان قول كوتەردىم. وسى ارەكەتىمنىڭ كەسىرىنەن ول قايتىس بولدى. بۇگىنگى ومىرىمدە ءمان قالمادى - بارىنەن ايىرىلدىم. بالالارىم اناسىز، مەنسىز ءوسىپ جاتىر. ەگەر سول كۇنگە قايتا ورالسام، ەشقاشان قول كوتەرمەس ەدىم. قول كوتەرمەڭىزدەر! اشۋدىڭ سالدارى - قايعى مەن وكىنىش. قازىر تەمىر توردىڭ ار جاعىندا وتىرمىن، ال بالالارىم اتا-اناسىنان ايىرىلدى»، - دەيدى جازاسىن وتەپ جاتقان ەر ادام.

تاعى ءبىر سوتتالعان ەر ادامنىڭ تاعدىرى دا ۇقساس.

«ايەلىممەن سول كۇنى ىشىمدىك اسەرىنەن سوزگە كەلىپ قالدىق. اشۋدى جەڭە الماي، وعان قول كوتەردىم. سونىڭ سالدارىنان وسى جەردە وتىرمىن. بالام نەبارى ەكى جاستا ەدى. قازىر ول اتا-انامنىڭ قولىندا. مەن اباقتىدان شىققاندا، بالام مەكتەپكە بارادى. ەگەر ۋاقىتتى كەرى قايتارا السام، سول جانجالدىڭ الدىن الىپ، ايەلىمە ەشقاشان قول كوتەرمەس ەدىم. بارىنە وكىنەمىن. بالامنان كەشىرىم سۇراعىم كەلەدى. ونىڭ الدىندا مەنىڭ كىنام كەشىرىلمەيتىندەي ۇلكەن»، - دەيدى ول.

بۇل ەكى وقيعا - وتباسىنداعى زورلىق-زومبىلىقتىڭ قايعىلى كورىنىسى عانا. اشۋعا بوي الدىرۋدىڭ سالدارى ادام ءومىرىن تالقانداپ، وتباسىن قايعىعا دۋشار ەتەدى. مۇنداي جاعدايلاردا جابىرلەنۋشى دە، زورلىق كورسەتۋشى دە اۋىر زارداپ شەگەدى.

قارىم-قاتىناستا سابىر مەن سىيلاستىق - وتباسىنىڭ بەرەكەسىن ساقتايتىن باستى قۇندىلىقتار. زورلىق-زومبىلىق ەشقاشان ماسەلەنىڭ شەشىمى بولا المايدى. ەگەر ءسىز زورلىق-زومبىلىققا كۋا بولساڭىز نەمەسە ونىڭ قۇربانىنا اينالساڭىز، ءۇنسىز قالماڭىز. قازىر كوپتەگەن داعدارىس ورتالىقتارى مەن سەنىم تەلەفوندارى كومەك كورسەتۋگە دايىن.

2024 -جىلى اتىراۋ وبلىسىنداعى داعدارىس ورتالىعىنا 104 ادام جۇگىنگەن، ولاردىڭ 75 ى - بالالار. قولداۋ الۋ ءۇشىن 473 ادام مامانداردىڭ كومەگىنە جۇگىنگەن، ونىڭ ىشىندە 351 ى كەڭەسشىلەردەن، 56 سى پسيحولوگتاردان، ال قالعاندارى زاڭگەرلەردەن كەڭەس العان.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى