ومىرتقا حيرۋرگياسى: عالىمدار وتاندىق يمپلانت ويلاپ تاپتى
استانا. قازاقپارات - وتاندىق عالىمدار مەن نەيروحيرۋرگتەر بىرلەسىپ، ومىرتقا جارىعىنا قويىلاتىن ارنايى يمپلانت ويلاپ تاپتى، دەپ حابارلايدى 24KZ.
ولار شەتەلدىك انالوگتاردى الماستىراتىن جاساندى ومىرتقا ارالىق ديسك ازىرلەدى. ونىڭ كومەگىمەن بۇگىنگە دەيىن 25 وپەراتسيا جاسالدى. ءنۇرالى تەنبايەۆ ومىرتقاعا وپەراتسيا جاساعان 25- ناۋقاس. دەرت ءبىر جىل بۇرىن انىقتالعانىمەن ول ۋاقىتىلى ەم قابىلداماعان. ايتۋىنشا، اۋەلدە كاسىبي دارىگەرلەرگە جۇگىنبەي، حالىقتىق ادىستەرمەن ەمدەلۋدى ءجون كورگەن. اۋرۋ اسقىنىپ، ءجۇرىپ-تۇرۋ قيىنداعان كەزدە دارىگەرگە بارعان.
وتاندىق يمپلانت - اكادەميك باتپەنوۆ اتىنداعى ۇلتتىق تراۆماتولوگيا، ۇلتتىق بيوتەحنولوگيا، ورتوپەديا عىلىمي ورتالىعىنىڭ جانە سەرىكبايەۆ اتىنداعى شىعىس قازاقستان تەحنيكالىق ۋنيۆەرسيتەتىنىڭ بىرلەسكەن جوباسى. تىڭ باستاما وسىدان ەكى جىل بۇرىن قولعا الىنعان. سودان بەرى وسكەمەندە تيتاننان جاسالعان جاساندى ومىرتقا ارالىق ديسكىلەر شىعارىلدى. قازىر ونى ەلوردالىق دارىگەرلەر دە قولدانادى.
جاڭگىر يپماعامبەتوۆ، تراۆماتولوگ-ورتوپەد:
- شەتەلدىك انالوگتارمەن سالىستىرعاندا قان تامىرلارىنىڭ ونۋىنە جانە سۇيەك سينتەزىن جاقسارتۋعا مۇمكىندىك بەرەدى. بۇگىنگى كۇنى ومىرتقا ارالىق جارىقتى حيرۋرگيالىق ەمدەۋدىڭ ەڭ قولايلى ءادىسى وسى. بۇل باستاما قازاقستان عىلىمىنداعى تىڭ سەرپىلىس دەپ ويلايمىن، يمپورتتى الماستىرۋ ماقساتىندا دا وتە ءتيىمدى.
وتاندىق ءونىم شەتەلدىكىنەن 6 ەسە ارزان. ەلگە قاجەتتى يمپلانتتى بۇعان دەيىن ا ق ش، ەۋروپا، قىتاي سىندى ەلدەردەن ساتىپ الاتىن ەدى. قازىر وتاندىق مامانداردى قولداۋعا ەرەكشە نازار بولىنەدى.
ماسەلەن، كورشى قىتايدىڭ دارىگەرلەرى ناۋقاستىڭ سۇيەك ءتىنىن قولدانۋعا قىزىعۋشىلىق تانىتقان. بۇل باعىتتا بيوتەحنولوگيا ورتالىعىنىڭ عالىمدارى جۇمىس ىستەپ جاتىر. ولار ناۋقاستىڭ ماي جاسۋشاسىنان دانەكەر ءتىن وسىرەدى.
مۇرات بايداربەكوۆ، اكادەميك باتپەنوۆ اتىنداعى ۇ ع ت و ومىرتقا حيرۋرگياسى ءبولىمىنىڭ مەڭگەرۋشىسى:
- ءبىز اۋتەلوگيالىق ۇلپادان سۇيەك ءتىنىن وسىرەمىز. وپەراتسيا كەزىندە، جارىقتى الىپ تاستاعاننان كەيىن ءبىز سۇيەك ءتىنىنىڭ تەز قالپىنا كەلۋىن قامتاماسىز ەتۋ ءۇشىن وسى جاسۋشالىق تەحنولوگيالاردى ەنگىزەمىز. قازاقستاندىق مەديتسينا ءۇشىن بۇل ۇلكەن جەتىستىك دەپ ايتا الامىن. زەرتتەۋ جۇمىستارى وسى جىلدىڭ سوڭىنا دەيىن اياقتالادى.
اكادەميك باتپەنوۆ اتىنداعى ۇلتتىق عىلىمي ورتالىقتىڭ دارىگەرلەرى جوبا ناتيجەسىن تاقاۋدا جاريالايدى. قازىر وپەراتسيا جاسالعان 25 ناۋقاس باقىلاۋدا. الايدا الدىن الا تاجىريبەلەر كورسەتكەندەي، يمپلانتات ءتيىمدى ءارى ادام ومىرىنە قاۋىپسىز.
