پوليتسەيلەر ەل اۋماعىندا 30 دان استام قىلمىس جاساعان كۇدىكتىنى ۇستادى
تۇركىستان وبلىسى پ د كريمينالدىق پوليتسيا باسقارماسىنىڭ قىزمەتكەرلەرى «كيبەرقىلمىسپەن كۇرەسكە ارنالعان باعدارلاما» جوسپارىن ىسكە اسىرۋ شەڭبەرىندە جەدەل-ىزدەستىرۋ ءىس-شارالارىن جۇرگىزىپ، بۇرىن بىرنەشە رەت سوتتى بولعان، قازاقستان اۋماعىندا بىرنەشە قىلمىس جاسادى دەپ كۇدىككە ىلىنگەن 31 جاستاعى ەر ادامدى ۇستادى. بۇل تۋرالى Kazinform polisia.kz-كە سىلتەمە جاساپ.
اتالمىش جامبىل وبلىسىنىڭ تۇرعىنى قىلمىستى الدىن الا جوسپارلاپ، كەز كەلگەن ءوتىپ بارا جاتقان ادامداردان قوڭىراۋ شالۋ ءۇشىن ۇيالى تەلەفوندارىن سۇراپ الىپ، سودان كەيىن بوي تاسالاپ وتىرعان. ول ۇرلاعان ۇيالى تەلەفونداردى ءىرى قالالاردىڭ بازارلارىندا ساتىپ، اقشانى ءوز قاجەتتىلىگىنە جۇمساعان.
بۇگىنگى تاڭدا پوليتسەيلەر كۇدىكتىنىڭ تۇركىستان وبلىسىندا جاسالعان 10 الاياقتىق قىلمىسى مەن 1 اۆتوكولىك ۇرلاۋ فاكتىسىنە قاتىسى بار ەكەنىن دالەلدەدى.
سونىمەن قاتار ەر ادامعا قىزىلوردا وبلىسىندا ۇرلىق جاساعانى ءۇشىن ىزدەۋ جاريالانعان. سونداي-اق «ۇرلىق» پەن «الاياقتىق» باپتارى بويىنشا قازاقستاننىڭ 3 مەگاپوليسى مەن 5 وبلىسىندا جاسالعان 22 قىلمىسقا قاتىسى بارى انىقتالدى.
قازىرگى ۋاقىتتا كۇدىكتى قاماۋعا الىندى. ونىڭ باسقا وسىعان ۇقساس اشىلماعان قىلمىستارعا قاتىستىلىعى تەكسەرىلىپ جاتىر. سوتقا دەيىنگى تەرگەۋ امالدارى جۇرگىزىلىپ، وقيعانىڭ تولىق ءمان-جايى انىقتالۋدا.
