پوليتسەي داۋىلدىڭ كەسىرىنەن ەكى كۇن بويى اش جاتقان ءسابيدى ەمىزدى
33 جاستاعى پوليتسيا قىزمەتكەرى اريزبەت ديونيسيو امبروسيو مەكسيكانىڭ اكاپۋلكو قالاسىنداعى قۇتقارۋ جۇمىسى كەزىندە الىستان بالانىڭ جىلاعان داۋسىن ەستىگەن. Kazinform بۇل تۋرالى BBC باسىلىمىنا سىلتەمە جاساپ حابارلايدى.
تاعى ءبىراز ۋاقىت وتكەننەن كەيىن ءوزىنىڭ دە ەكى بالاسى بار امبروسيو ءسابيدىڭ ءۇنىن تاعى ەستىپ، سەبەبىن انىقتاۋعا تىرىسادى.
سول كەزدە ءتورت ايلىق بالانىڭ اناسىنا كەزىككەن. ايەل ۇلىنىڭ ەكى كۇننەن بەرى ەشتەڭە جەمەگەنىن، قارنى اشىپ جىلاپ جاتقانىن ايتقان.
«مەن وعان قازىر ءوزىم دە بالا ەمىزەتىن انا ەكەنىمدى، قالاسا بالاسىن ەمىزىپ بەرە الاتىنىمدى ايتتىم»، - دەيدى پوليتسيا قىزمەتكەرى مەكسيكالىق N+ تەلەارناسىنا بەرگەن سۇحباتىندا.
امبروسيو قورعانىس جابدىقتارىن شەشىپ، اش بالانى ەمىزگەننەن كەيىن ءسابي جىلاۋىن قويعان.
«كوڭىلىم جايلانىپ قالدى. بالا عوي، انالارعا ەڭ قيىنى - بالاڭدى وسىنداي جاعدايدا كورۋ»، - دەيدى ول.
وسى ءسات اكاپۋلكوعا قۇتقارۋ كومانداسىن جىبەرگەن مەحيكونىڭ ازاماتتىق قورعانىس حاتشىلىعىنىڭ دەمالىس كۇنى جاريالاعان سۋرەتىندە بەينەلەنگەن.
سۋرەتتەر الەۋمەتتىك جەلىلەرگە تاراپ، جاقىندا بولعان داۋىلدان زارداپ شەككەن اكاپۋلكوعا الاڭداپ وتىرعان ادامداردى تەبىرەنتتى.
اكاپۋلكو كۋرورت قالاسى مەن ونىڭ ماڭىنداعى مۋنيتسيپاليتەتتەر جويقىن «وتيس» داۋىلىنان كەيىن ەندى ەس جيىپ جاتىر.
31-قازاندا جاريالانعان رەسمي دەرەك بويىنشا، داۋىل سالدارىنان 45 ادام مەرت بولىپ، 47 تۇرعىن ءىز-ءتۇزسىز جوعالىپ كەتكەن.
