وليمپياداعا بارا جاتقان وقۋشىلاردىڭ قازاسىنان سوڭ ەكى قىلمىستىق ءىس قوزعالدى
وقۋشىلاردىڭ ولىمىنەن سوڭ قىلمىستىق كودەكستىڭ 345-بابى 4-بولىگى جانە 141-بابى بويىنشا قىلمىستىق ءىس قوزعالدى.
وقۋشىلاردى نەلىكتەن پوليتسيانىڭ الىپ جۇرمەگەنى تەكسەرىلىپ جاتىر، دەپ حابارلايدى Kazinform.
وقۋشىلاردىڭ قازاسىنان سوڭ وڭىرلىك كوممۋنيكاتسيالار قىزمەتىندە بريفينگ ءوتتى. وندا اقتوبە وبلىسى اكىمىنىڭ ورىنباسارى بۇلبۇل ەلەۋسىنوۆا بالالار مىنگەن كولىكتىڭ نەگە ەش رۇقسات الماعانى تەكسەرىلەتىنىن ايتتى.
«نەگىزىنەن بۇل شارا وقۋ-اعارتۋ مينيسترلىگىنىڭ بۇيرىعىمەن رەسپۋبليكالىق وليمپيادانى ۇيىمداستىرۋ اياسىندا وتكىزىلىپ وتىر. مينيسترلىك بۇيرىعىنا سايكەس اۋداندىق ءبىلىم ءبولىمىنىڭ مىندەتىن اتقارۋشى ارنايى بۇيرىق شىعارعان. بۇگىنگى اقپاراتقا سايكەس تەمىراستاۋ مەكتەبىنەن 10 بالاعا ءوتىنىش تۇسكەن. 10 بالانى تاسۋ ءۇشىن مەكتەپ ەكى كولىككە ۇسىنىس بەردى، پوليتسياعا حابارلادى. ولاردى ىرعىز اۋدانىنا دەيىن بىرگە اپارۋعا. ءبىراق جول اپاتىنا ۇشىراعان بەس وقۋشى مەن مۇعالىم باسقا كولىكپەن شىققان. ەندى سونىڭ سەبەبى انىقتالادى»، - دەدى اقتوبە وبلىسى اكىمىنىڭ ورىنباسارى بۇلبۇل ەلەۋسىنوۆا.
اقتوبە وبلىستىق ءبىلىم باسقارماسىنىڭ باسشىسى جايىق سۇلتاننىڭ ايتۋىنشا، ءبىر وقۋشىنىڭ اتا-اناسى مەن جۇرگىزۋشى تۋىس بولعان. ولار ءوزارا كەلىسۋى دە مۇمكىن. جالپى اقتوبە وبلىستىق ءبىلىم باسقارماسىنا قاراستى مەكەمەلەردە 148 اۆتوبۋس بار. بۇگىنگى كۇنى ىرعىز اۋدانى بويىنشا ىرعىز گيمنازياسىندا عانا ءبىر اۆتوبۋس تىركەۋلى.
«جالپى بالالاردى وليمپياداعا تاسىمالداۋ ماسەلەلەرىنىڭ بارلىعى بەلگىلەنگەن بۇيرىققا سايكەس ءبىلىم بولىمدەرىنە جانە جەرگىلىكتى جەردەگى مەكتەپتەردىڭ باسشىلارىنا جۇكتەلگەن. ۇيىمداستىرۋ كەزىندە كەمشىلىكتەر كەتىپ وتىر. جالپى بالالاردى وليمپيادا نەمەسە قانداي دا بولماسىن شىعارماشىلىق شارالارعا قاتىستىرۋ ءۇشىن ارنايى اۆتوبۋستار قارالماعان. وبلىستىق ءبىلىم باسقارماسىنا قاراستى 148 اۆتوبۋس مەكتەپتەردەن 3 شاقىرىم قاشىق تۇراتىن بالالاردى تاسىمالداۋعا عانا جۇمىلدىرىلىپ وتىر»، - دەدى اقتوبە وبلىسى اكىمىنىڭ ورىنباسارى بۇلبۇل ەلەۋسىنوۆا.
قازىرگى كەزدە ەكى قىلمىستىق ءىس قوزعالدى.
«وقۋشىلاردى تاسىمالداۋ ءۇشىن ءۇش كۇن بۇرىن سۇرانىس بەرىلگەن. كوپشىلىگى امان-ەسەن، ءتورت كوزى تۇگەل جەتتى وليمپياداعا. الايدا Toyota Alphard اۆتوكولىگى سۇرانىس بەرىلگەن كولىك تىزىمىندە جوق. قازىر ق ر ق ك 345-بابى 4-بولىگى بويىنشا ءىس قوزعالدى. جانە دە ەكىنشى قىلمىستىق ءىس بار. ق ر ق ك 141-بابى، ياعني بالالاردىڭ ءومىرى مەن دەنساۋلىعىن، قاۋىپسىزدىگىن قامتاماسىز ەتۋ جونىندەگى مىندەتتەردى تيىسىنشە ورىنداماعانى ءۇشىن قوزعالدى. بۇل قىلمىستىق ءىس اياسىندا قازىر جاۋاپتى تۇلعالاردىڭ جاۋاپكەرشىلىكتەرى قارالادى. ال جۇرگىزۋشى قاماۋعا الىنادى»، - دەدى وبلىستىق پ د باستىعىنىڭ ءبىرىنشى ورىنباسارى اردانا سايماعامبەتوۆ.
ايتا كەتەيىك، ىرعىز اۋدانىنا اقتوبە وبلىسىنىڭ اكىمى بۇلبۇل ەلەۋسىنوۆا، وبلىستىق ءبىلىم جانە دەنساۋلىق ساقتاۋ باسقارمالارىنىڭ باسشىلارى بارادى.
ەسكە سالساق، امان قالعان وقۋشىلاردىڭ جاعدايى ورتاشا اۋىر. ءبارى دە اۋرۋحانادا جاتىر. ال جۇرگىزۋشىگە پسيحولوگيالىق كومەك كورسەتىلدى.
