ولجاس قۇرمانبەك ۇلى ديماشپەن بىرگە ۆەنگريا مەن تۇركيادا ونەر كورسەتەدى
استانا. قازاقپارات - ولجاس قۇرمانبەك - الەم ساحناسىن باعىندىرىپ، الەۋمەتتىك جەلىدە تىڭدارمانداردىڭ جۇرەگىن جاۋلاعان كاسىبي قوبىزشى.
مۋزىكانت قازاقتىڭ ءداستۇرلى اسپابىن 20 جىل بويى سەرىك ەتىپ كەلەدى.
2017 -جىلدان بەرى ولجاس الەمگە ايگىلى ءانشى ديماش قۇدايبەرگەنمەن بىرگە ۇلكەن ساحنادا ونەر كورسەتىپ ءجۇر. قوبىزشى شەتەلدىك فيلمدەردىڭ ساۋندترەگىن ورىنداپ، الەۋمەتتىك جەلىلەرگە جاريا ەتكەننەن كەيىن، كوپشىلىككە تانىمال بولا باستادى.
ونىڭ رەپەرتۋارىندا رەسەيلىك پروديۋسەر يگور كرۋتوي مەن ديماش بىرگە جازعان ەكى ءان، سونداي-اق كومپوزيتور رەنات گايسيننىڭ شىعارمالارى بار.
وسى جىلدىڭ مامىر ايىندا «Stranger» كونسەرتتىك تۋرى اياسىندا ولجاس ۆەنگريا مەن تۇركيادا ديماشپەن بىرگە ونەر كورسەتەدى. قوبىزشى جەكە جانە دۋەتپەن بەس ءنومىر ورىندايدى.
«شەتەلدىك گاسترولدەر كەزىندە ءار كونسەرتتە كورەرمەندەر كەلىپ، ولار ءۇشىن ەرەكشە اسپاپ - قوبىزدىڭ ۇنىنە قىزىعۋشىلىق تانىتىپ، ءتانتى بولادى. سوندىقتان مەن قازاق مۋزىكالىق اسپابىن بۇكىل الەمگە دارىپتەگىم كەلەدى»، - دەپ مۋزىكانت شىعارماشىلىعىنداعى باستى ارمانىن ايتتى.
مۋزىكانت بيىل جەكە كونسەرت بەرۋدى جوسپارلاپ وتىر.
ايتا كەتەيىك، ولجاستىڭ اتا-اناسى - قىتاي حالىق رەسپۋبليكاسىنىڭ ەڭبەك سىڭىرگەن ارتىستەرى جانە قازاقستاننىڭ ەڭبەك سىڭىرگەن قايراتكەرلەرى جۇباي انشىلەر قۇرمانبەك ءالىمعازى مەن ريزا قايىرباي قىزى. ءبىرى اعاجاي التاي وڭىرىندە، ءبىرى تارباعاتاي تاۋىنىڭ باۋرايىندا دۇنيەگە كەلگەن ونەرلى جۇپ: «كوك تۋدىڭ جەلبىرەگەنى»، «اسەم قۇلجا باعىندا»، «اينالدىم ەلىم»، «ءجىپتى ينە»، «اياۋلى بوتاكوزىم»، «ناز»، «التىننان اياق»، «تاقتادا» ت. ب اندەرىمەن ەلگە تانىلدى. ولار ۇمىتىلا باستاعان 50 دەن استام حالىق اندەرىن اتاجۇرتقا الىپ كەلگەن.
