ولجاس بەكتەنوۆ: تاريحي قۇجاتتاردى سيفرلىق ارحيۆتە ساقتاپ، قولجەتىمدى ەتۋ كەرەك
استانا. KAZINFORM - «ە-ارحيۆ» دەرەكتەرى «باتىرلارعا تاعزىم» ونلاين- پلاتفورماسىنا ورنالاستىرىلادى. بۇل تۋرالى پرەمەر- مينيستر ولجاس بەكتەنوۆ ءمالىم ەتتى.
- «ە-ارحيۆ» اقپاراتتىق جۇيەسىن ودان ءارى دامىتۋعا باسا نازار اۋدارعان ءجون. ول قۇجاتتاردىڭ ساقتالۋىن قامتاماسىز ەتىپ، ارحيۆ جۇمىسىنىڭ تيىمدىلىگىن ارتتىرادى. «ە- ارحيۆ» دەرەكتەرىن «باتىرلارعا تاعزىم» ونلاين- پلاتفورماسىمەن ۇيلەستىرۋ جۇمىستارىن اياقتاۋ قاجەت. قولىمىزدا بار تاريحي قۇجاتتاردىڭ ءبارىن ۇلتتىق تسيفرلىق ارحيۆ بازاسىندا ساقتاپ، قولجەتىمدى ەتۋىمىز كەرەك، - دەدى ولجاس بەكتەنوۆ ۇكىمەت وتىرىسىندا.
ودان ءارى ۇكىمەت باسشىسى كىتاپحانا سالاسىن جەتىلدىرۋ كەرەكتىگىن ايتتى.
- «ە- كىتاپحانا» جۇيەسىندە قازىردىڭ وزىندە كلاسسيكادان باستاپ زاماناۋي باسىلىمدارعا دەيىنگى كىتاپتاردى وقۋعا مۇمكىندىك بار. الداعى ۋاقىتتا ولاردىڭ سانىن كوبەيتىپ، قولدانىستاعى پلاتفورمالارمەن بەلسەندى جۇمىس ىستەۋ كەرەك. سونىمەن قاتار قازىر اۋديو-كىتاپتار وتە تانىمال. قازاقستاندىق اۆتورلاردىڭ اۋديو-كىتاپتارىن جاساپ، ولاردى ءتۇرلى پلاتفورمالارعا، ونىڭ ىشىندە ءارتۇرلى تىلدەردە دە ورنالاستىرۋ قاجەت. وسىلايشا ادەبيەتىمىزدى ەلىمىزدە عانا ەمەس، ودان تىس جەرلەردە دە ناسيحاتتاي الامىز، - دەيدى ول.
بۇعان دەيىن ولجاس بەكتەنوۆ فيلمنەن تۇسەتىن پايدانىڭ كوبى كينوتەاتر يەلەرىندە قالىپ جاتقانىن ايتتى.
ايتا كەتسەك، بىلتىر وتاندىق كينو ءوندىرىسى 58 پايىزعا ارتتى. پرەمەر-مينيستر كينو تۋىندىلاردىڭ سانىن كوبەيتىپ، تەك پايدا ءتۇسىرۋدى عانا ماقسات ەتپەي، فيلمدەردىڭ ساپاسىنا باسا نازار اۋدارۋ كەرەكتىگىن باسا ايتتى.
