ولجاس بەكتەنوۆ كىشى ارالدىڭ جاعدايىن تەكسەرىپ، سۋدى ۇنەمدەۋ بويىنشا تاپسىرمالار بەردى

ولجاس بەكتەنوۆ مەملەكەت باسشىسىنىڭ كىشى ارالدى ساقتاۋ جانە دامىتۋ جونىندەگى تاپسىرمالارىنىڭ ورىندالۋ بارىسىمەن تانىستى، اتاپ ايتقاندا قاراوزەك سۋ قويماسىنىڭ قۇرىلىسىنا نازار اۋدارىلدى جانە كوكارال بوگەتىن رەكونسترۋكتسيالاۋ قارقىنى تەكسەرىلدى، دەپ حابارلايدى ۇكىمەتتىڭ باسپا ءسوز قىزمەتى.

ءوڭىردىڭ نەگىزگى سۋ كوزى - سىرداريا وزەنى. سوڭعى بىرنەشە جىلدا وزەن سۋىنىڭ ازايۋىنا بايلانىستى سولتۇستىك ارالدا جينالعان سۋدىڭ ورتاشا جىلدىق كولەمى جوبالىق 27 ميلليارد تەكشە مەتردەن 2022-جىلى 18,9 ميلليارد تەكشە مەترگە دەيىن تومەندەدى. بۇگىنگى تاڭدا سۋ اعىنىن سەكۋندىنا 6 تەكشە مەتردەن 50 تەكشە مەترگە دەيىن ۇلعايتۋ بويىنشا قابىلدانعان شارالار ناتيجەسىندە سولتۇستىك ارالدا سۋ كولەمى 21,4 ميلليارد تەكشە مەتردى قۇرادى - وسى جىلدىڭ باسىنان بەرى 1,5 ميلليارد تەكشە مەتر سۋ كەلدى. وبلىستىڭ الەۋمەتتىك- ەكونوميكالىق دامۋى مەن ەكولوگيالىق جاعدايى سىرداريا وزەنى باسسەينىنىڭ سۋمەن جابدىقتالۋىنا تىكەلەي بايلانىستى ەكەنى انىق، ءداريانىڭ جاعاسىندا ايماقتاعى ەلدى مەكەندەردىڭ 85 پايىزى ورنالاسقان، جەرگىلىكتى حالىقتىڭ 93 پايىزدان استامى ءومىر سۇرەدى.

بۇگىنگى تاڭدا وڭىردە سۋ ۇنەمدەۋ تەحنولوگياسى بەلسەندى تۇردە ەنگىزىلىپ جاتىر. وبلىستا 286 مىڭ گەكتار سۋارمالى جەر بار، ونىڭ 185-190 مىڭ گەكتارىنا اۋىل شارۋاشىلىعى داقىلدارى ەگىلەدى. مەملەكەت باسشىسىنىڭ ەگىستىكتى ءارتاراپتاندىرۋ تۋرالى تاپسىرماسى بويىنشا بيىل كۇرىش القابى 6 مىڭ گەكتارعا قىسقارتىلدى. لازەرلىك تەگىستەۋ كۇرىش القاپتارىن سۋارۋعا جۇمسالاتىن سۋدىڭ شىعىنىن ازايتۋعا مۇمكىندىك بەردى. يننوۆاتسيالىق تەحنولوگيانىڭ ارقاسىندا سوڭعى 10 جىلدا سۋدى 20 پايىزعا دەيىن ۇنەمدەۋگە جانە ونىمدىلىكتى 30 پايىزعا دەيىن ارتتىرۋعا مۇمكىندىك تۋدى. بۇدان باسقا، وڭىردە باسقا دا سۋ ۇنەمدەۋ تەحنولوگيالارىن ەنگىزۋ كولەمى بيىل 4,2 مىڭ گەكتارعا جەتتى، 2030-جىلعا دەيىن بۇل كورسەتكىشتى 34,2 مىڭ گەكتارعا دەيىن ۇلعايتۋ كوزدەلگەن. وسى باعىتتا قازىرگى ۋاقىتتا قىزىلوردا وبلىسىندا جالپى اۋدانى 4,8 مىڭ گەكتار بولاتىن 3 ءىرى ينۆەستيتسيالىق جوبا ىسكە اسىرىلىپ جاتىر.

«مەملەكەت باسشىسى سۋ ۇنەمدەۋ تەحنولوگيالارىن ەنگىزۋدى جەدەلدەتۋدى تاپسىردى. سىرداريا وزەنىندەگى سۋ تاپشىلىعىن ەسكەرە وتىرىپ، جەر استى سۋلارىن ۇتىمدى پايدالانۋ ماقساتىندا سۋ رەسۋرستارى جانە يرريگاتسيا مينيسترلىگىنە جەر استى كوزدەرىنە زەرتتەۋ جۇرگىزۋدى تاپسىرامىن»، - دەدى ولجاس بەكتەنوۆ.

پرەمەر-مينيستر سۋ رەسۋرستارى جانە يرريگاتسيا مينيسترلىگىنە سىيىمدىلىعى 775 ميلليون تەكشە مەتر بولاتىن قاراوزەك سۋ قويماسىن سالۋ بويىنشا قىزىلوردا وبلىسىندا ىسكە اسىرىلىپ جاتقان جوبانى قارجىلاندىرۋ جونىندە ۇسىنىستار ەنگىزۋدى تاپسىردى. جاڭا تەحنيكالىق قۇرىلىستىڭ نەگىزگى ماقساتى - كوكارال بوگەتى ارقىلى ۇلكەن ارال تەڭىزىنە قايتارىلمايتىن سۋدىڭ ءبىر بولىگىن ساقتاۋ. بۇل شارالار ۆەگەتاتسيالىق كەزەڭدە قازالى اۋدانىنىڭ 31 مىڭ گەكتار ەگىستىك جەرلەرىن جانە ارنا بويىندا ورنالاسقان 11 مىڭ گەكتار شابىندىق پەن جايىلىمدى سۋمەن قامتاماسىز ەتەدى. قاراوزەك سۋ قويماسى ەلىمىزدە باسىم تارتىپپەن سالىنۋى ءتيىس 9 سۋ ينفراقۇرىلىمى وبەكتىلەرىنىڭ تىزبەسىنە ەنگىزىلگەن.

ۇكىمەت باسشىسىنا بيىل اياقتالاتىن كوكارال بوگەتىن رەكونسترۋكتسيالاۋ جوسپارى تۋرالى باياندالدى. جوبانى ىسكە اسىرۋ شەڭبەرىندە بۇلىنگەن بوگەت، سونداي-اق قاراشالان جانە تۇشى كولدەرى ارقىلى تەڭىزگە شىعاتىن ارنالار قالپىنا كەلتىرىلەتىن بولادى. ولجاس بەكتەنوۆ ۇكىمەت سۋ رەسۋرستارىن ءتيىمدى پايدالانۋ، سۋ جيناۋ ليميتتەرىن جانە سىرداريا مەن امۋداريا باسسەيندەرى بويىنشا سۋ قويمالارى كاسكادىنىڭ جۇمىس رەجيمدەرىن ساقتاۋ ماسەلەلەرىندە كورشى ەلدەرمەن جۇمىستى جالعاستىراتىنىن اتاپ ءوتتى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى